Meditime – 1 Korrik

Lexoni nga Marku 6:14-29

Të ngjashëm me Herodin

Herodi, pra, e kishte frikë Gjonin, të cilin e dinte si njeri të drejtë dhe të shenjtë dhe e ruante. (v. 20)

Mbreti Herod, në Bibël, konsiderohet në përgjithësi si një nga të këqijtë. Ai ishte i pamëshirshëm dhe egoist, si dhe dëshironte të kishte pushtet. Ky ishte njeriu që masakroi fëmijët meshkuj në Betlehem dhe vrau anëtarë të familjes së tij. Historia e sotme tregon thjesht një rast tjetër të natyrës së kalbur të Herodit. Por vargjet e sotme zbulojnë gjithashtu se ai kishte edhe një anë të mirë. Gjon Pagëzori dhe mesazhi i tij kishte diçka që kishte lënë mbresa te Herodi. Vargu 20 thotë se ai “e kishte frikë Gjonin, të cilin e dinte si njeri të drejtë dhe të shenjtë”. Ndonëse fjalët e Gjonit ishin goxha pështjelluese për Herodin, ai përsëri “e dëgjonte me kënaqësi”.

Megjithatë, gruaja e mbretit, Herodiada, e përçmonte Gjonin. Ajo ishte përpjekur për vite me radhë të gjente një mënyrë për ta hequr qafe belanë me emrin Gjon. Kështu që, kur i doli mundësia në shteg, përmes kërcimit të vajzës së saj, ajo e mbërtheu atë. Dhe Herodi, e zbatoi kërkesën e fëlliqur.
Herodi është një përzierje e të mirës dhe të keqes. Kur rri e mendon, në fakt, të gjithë jemi të tillë. Por problemi me Herodin është se ai refuzoi të bënte atë që ishte në thelb të mesazhit të Gjonit, pra, të pendohej. Patjetër që ne të gjithë mëkatojmë. Por ndryshimi është se çfarë bëjmë me mëkatin tonë. Mesazhi i ungjillit thotë se kur pendohemi për mëkatet tona dhe i drejtohemi Jezusit me besim, atëherë Perëndia na fal dhe na jep një jetë të re që nuk do të mbarojë kurrë.—John Koedyker

Lutje: O Zot, kur përballemi me mëkatet tona, na ndihmo të pendohemi dhe të të besojmë ty për falje. Amen.

Komente

komente