Meditime – 13 Korrik

Lexoni nga Eksodi 4:3-9

Shenja dashamirësie 

Me qëllim që të besojnë . . . (v. 5)

Në një farë mënyre, të gjithë jemi pak si Moisiu. Kur detyra që na jep Perëndia rritet dhe kalon përtej aftësive tona dhe koka na mbushet me pyetje dhe dyshime, atëherë i kërkojmë Perëndisë: “tregomë një shenjë të dashamirësisë sate” (Psa. 86:17). Po të jemi të çiltër, kush nuk do t’i pranonte ato shenja të mëdha e dramatike që Perëndia i dha Moisiut. Tre shenja të pamohueshme të dashamirësisë: shkopi i tij kthehet në gjarpër, dora e tij bëhet me lebër dhe uji shndërrohet në gjak. Të gjitha këto “me qëllim që të besojnë” (v. 5). Gjatë javëve të mia të para si president i ri tek Fjalët e Shpresës, unë dëshiroja një shenjë të madhe. Largimi nga një shërbesë si pastor për 24 vjet, për të drejtuar një organizate misioni ishte një ndryshim i madh, si personalisht ashtu edhe profesionalisht. Isha i mbushur me pasiguri, ankth dhe frikë, dhe doja një shenjë të madhe. Mora një mesazh në celular. Ishte bashkëshortja ime që thjesht më shkroi: “Paç një ditë plot e përplot me surpriza”.

Pak më vonë, prindërit e një mikut tim më morën në telefon për të ndarë me mua gëzimin e tyre që unë kisha marrë këtë hap besimi dhe gjithashtu për të më thënë se Perëndia u kishte vendosur në zemër ta mbështesnin shërbesën financiarisht. Nuk ishte aspak dramatike si shkopi që kthehet në gjarpër, dora që bëhet me lebër apo uji që shndërrohet në gjak. Kjo ishte një shenjë e vogël e dashamirësisë së Perëndisë. Pa pikë dyshimi! Nuk mund t’i injorojmë shenjat e vogla. Ujërat e pagëzimit janë një shenjë e vogël dhe e thjeshtë. Po ashtu edhe buka dhe vera në Darkën e Zotit. Qoftë shenja të vogla apo të mëdha, ato i drejtojnë sytë tanë tek ai që është me ne, edhe atëherë kur na thërret ta ndihmojmë me detyra të mëdha.—Jon Opgenorth

Lutje: Faleminderit o Zot, për shenjat e dashamirësisë sate.

Komente

komente