Meditime – 3 Janar

Lexoni nga Zanafilla 3
Të përjashtuar nga shtëpia
Kështu ai e dëboi njeriun. (v. 24)

Çfarë bëni ju kur e gjeni veten jashtë të vetmes shtëpi që njihni? Për mua, largimi nga shtëpia, ka qenë gjithmonë i vështirë. Unë isha i përmalluari kur shkonim në kampin e pionierëve. Javën e parë të universitetit, më zinte gjumi duke qarë. Dhe dy transferime si pastor sollën sfida të jashtëzakonshme në vendet e reja. Mua më ka pëlqyer gjithmonë aventura, por largimi nga shtëpia ka rezultuar i vështirë.
Ndoshta nuk kemi shpata flakëruese që na bllokojnë rrugën, por të gjithë “largohemi nga shtëpia” në një pikë të caktuar: fëmijët shkojnë në universitet, dikush emigron jashtë vendit apo prindërit që transferohen në qytet për të qenë afër fëmijëve të tyre. Ndonjëherë largimi është më i dhimbshëm, si për shembull kur divorci shkatërron një familje, kur njëri nga bashkëshortët ndahet nga jeta apo kur pleqëria dhe varfëria na detyrojnë të shkojmë në azil. Ka nga ata që e lexojnë këtë, që janë të detyruar ta quajnë burgun shtëpi.
Zanafilla 3 shpjegon se si erdhi mëkati në botë, por gjithashtu na ofron informacion se si duket jeta kur largohemi nga shtëpia. Vini re ato që Perëndia thotë dhe bën. Ai bën një premtim tronditës kur thotë se pasardhësi i gruas do t’i shtypë kokën gjarprit (v. 15). Kjo është profecia e parë për Jezusin! Dhe përpara se Perëndia t’i largojë, ai i vesh me tunika prej lëkure (v. 21). Perëndia u premton një të ardhme dhe siguron për të sotmen. Gjithashtu, vini re që edhe Adami me Evën i kthehen punës. Adami fillon përsëri të vendosë emra. Ai e quan gruan e tij “Eva”, dhe ata rifillojnë jetën e tyre bashkëshortore dhe krijojnë një familje (4:1).
Kur jeta ju gjen një vend të ri, mbani vesh për premtimet e Perëndisë, hapni sytë për sigurimin e tij dhe bëni punë për mbretërinë e Perëndisë.—Jon Opgenorth

Ndërsa luteni, kërkojini ndihmë Perëndisë për të jetuar kudo ku e gjeni veten.

Komente

komente