Meditime – 3 Korrik

Lexoni nga Eksodi 2:4-9

Poshtë tek kallamishtet

A duhet të shkoj të thërras një tajë? (v. 7)

Dy vajza atje tek kallamishtet: njëra skllave, e tjetra princeshë. Dy vajza poshtë tek kallamishtet, dhe një foshnje që qan në një kanistër. Ato e dinë rregullin: djali duhet të vdesë. Por princesha preket nga dhembshuria. Skllavja e vogël merr disa masa dhe djali i porsalindur jeton edhe një ditë tjetër. Në këtë situatë, Perëndia thur ngjarjet dhe njerëzit për t’i dhënë formë të ardhmes. Asnjëra prej vajzave nuk mund ta dinte, por në atë çast, aty poshtë midis kallamishtes, Perëndia po orkestronte një plan 80 vjeçar për ta çliruar Izraelin nga skllavëria. Dhe ky plan varej tek dy vajza që ishin tek kallamishtet.

Dhembshuria jetëdhënëse e princeshës dhe veprimi guximtar i motrës çuan në rezultate të paimagjinueshme. Madje edhe nëna e djalit të vogël mori rrogë për ta ushqyer atë me gji! Dhembshuria dhe veprimi përmbushen tek Jezusi, tek ai që na drejtojnë edhe këto dy vajza. Bibla thotë: “Por duke parë turmat, [Jezusi] pati dhembshuri për ta” (Mat. 9:36). Gjithashtu Bibla thotë: “Por Perëndia e tregon dashurinë e tij ndaj nesh në atë që, kur ende ishim mëkatarë, Krishti vdiq për ne” (Rom. 5:8). Jezusi ndjen dhembshuri për ne dhe vepron për ne duke vdekur në vendin tonë. Neve na është kursyer ferri dhe na është dhënë jeta e përjetshme.  Duke menduar për jetën tuaj, kush ka pasur dhembshuri për ju? Kush veproi (mori masa) në interesin tuaj? Cilat janë ato çaste të vogla e përcaktuese që shihni se ju kanë çuar drejt vendit ku e gjeni veten tani? Dhe ndërsa jeni duke menduar për jetën tuaj, hidhini sytë përreth. Kë po dërgon Perëndia tek kallamishtet që të shkojë përpara jush?—Jon Opgenorth

Lutje: Faleminderit o Jezus për dhembshurinë tënde dhe që vepron në interesin tim. 

Komente

komente