Meditime – 3 Qershor

Lexoni nga Efesianëve 4:25-32

Si ju pëlqen t’i hani fasulet?

Secili të flasë të vërtetën me të afërmin e tij. (v. 25)

Një ditë të gjatë vere, kur isha i vogël, bashkë me shokët e mi e ngarkuam karrocën time për të shkuar në një piknik me salsiçe të pjekura. Gjithashtu morëm me vete edhe një kuti të konservuar me mish derri dhe fasule. Ecëm për disa minuta, derisa mbërritëm pranë një përroi që kalonte poshtë një kanali në rrugë. Dhe aty, në tunelin e madh të kanalizimit të ujërave, ndërtuam një zjarr ku mund të rrinim të qetë e të fshehur nga sytë e botës.

Kur erdhi koha për mishin e derrit dhe fasulet, një nga shokët e mi tha: “Babi im thjesht e vë ashtu në zjarr kutinë prej teneqeje”. Kjo ishte kollaj. Por ai harroi të na thoshte se, para se ta vinte në zjarr, babi i hapte një vrimë kutisë. Kur papritur, BAM! Veshja prej çimentoje e kanalit poshtë rrugës së fshatit tani u vesh me një shtresë të nxehtë e ngjitëse. Në vend që të hanim mish derri me fasule, thjesht e shikonim atë që pikonte nga tavani poshtë në zjarr.

Çfarë përvoje e paharruar dhe e pamend e fëmijërisë, e megjithatë një përvojë që ka ngulitur tek unë rëndësinë për të treguar të gjithë historinë, pra, të gjithë të vërtetën. Një nga treguesit kryesor të një bashkëbisedimi të sinqertë është kur themi të vërtetën. Gjithashtu, kur themi të vërtetën, është si një provë se po jetojmë një jetë të re në Krishtin Jezus, i cili mishëron të vërtetën e Perëndisë në trajtë njerëzore. Jezusi foli gjithmonë dhe e vuri në praktikë të vërtetën. Ai nuk çorientoi askënd me fjalët apo veprat e tij. Ata njerëz që kishin pyetje, dyshime, kërkesa dhe lëndime mund të mbështeteshin tek Jezusi për të vërtetën.
A mund të mbështeten këta njerëz tek unë dhe tek ju?—Chic Broersma

Lutje: O Zot i të vërtetës dhe i urtësisë, na bëj gati për ta treguar të gjithë të vërtetën me kujdes.

Komente

komente