Meditime – 5 Korrik

Lexoni nga Eksodi 2:11-15

Kur mëkatojmë

E vrau egjiptasin. (v. 12)

Nuk mund ta zhbëjmë atë që kemi bërë. Mundohemi të fshihemi dhe të fshehim. Padyshim që identifikohemi me fshehjen që Moisiu i bëri trupit të egjiptasit. Jetët tona janë të mbushura me të madhërishmen dhe me të rrëmujshmen. Kemi vjedhur ndonjë karamele nga bufeja. Kemi përplasur makinën e babit. Thamë ato fjalë që s’duheshin. Ose diçka shumë e shumë më të keqe se kaq. Pastën e dhëmbëve që kemi nxjerrë nuk mund ta fusim prapë brenda. Moisiu mund të fshihte një trup, por nuk mund të zhbëjë një vrasje. Çliruesi i madh i Izraelit vrau me gjakftohtësi një njeri. Por kur vjen puna këtu, hidhini një sy Shkrimit për të parë se si çdo “shenjtor” i madh e katranosi diku. Abrahami gënjeu për gruan e tij duke thënë se është e motra. Davidi tradhtoi me Bathshebën dhe urdhëroi që burri i saj të vritej. Pjetri mohoi Jezusin. Tri herë! “Sepse të gjithë kanë mëkatuar dhe nuk e arrijnë lavdinë e Perëndisë.” (Rom. 3:23).

Moisiu, 40 vjeçar, e ngatërron vrasjen me misionin dhe arratiset të shpëtojë jetën e vet. Ne e dimë që Perëndia përdori dyzet vitet e ardhshme për të vazhduar me formimin dhe përgatitjen e tij për të udhëhequr Izraelin jashtë Egjiptit dhe përmes shkretëtirës. Por tani, në këtë vend e në këtë orë, ai duhet të ketë qenë i frikësuar dhe konfuz.  Po ju? Satanit i pëlqen të na kujtojë mëkatin dhe dështimin tonë nga e kaluara. Ndoshta ai mendon se gabimet tona na s’kualifikojnë nga qëllimi i ardhshëm në mbretërinë e Perëndisë. Kjo nuk ishte e vërtetë për Moisiun (apo për Davidin, Pjetrin, Palin, etj.) dhe, për shkak të Jezusit, kjo nuk është e vërtetë as për ju. Perëndia ju flet: “Unë, pikërisht unë, jam ai që … fshij shkeljet e tua dhe nuk do t’i mbaj mend mëkatet e tua” (Isa. 43:25). —Jon Opgenorth

Lutje: Faleminderit o Atë, që na ke ofruar falje përmes Jezusit.

Komente

komente