Meditime – 7 Qershor

Lexoni nga 2 Timoteut 1

Nuk kemi një Frymë frike

Sepse Perëndia nuk na ka dhënë frymë frike, por force, dashurie dhe mendjekthjelltësie. (v. 7)

Mbesa jonë ishte në një panair bashkë me viçin e saj. Na dërgoi më vonë një foto të sajën bashkë me viçin. Nga fotografia dukej më shumë si një lopë e rritur. Dhe e pyeta: “A të bindet kur ecën vërdallë me viçin?”. Ajo më tha: “Viçi duhet ta dijë se kush komandon!”.

Bëjini vetes pyetjen: “Kush e komandon jetën time?”. A është me të vërtetë Jezusi? Ndonjëherë, ndërsa takohemi me të krishterë të tjerë, nuk është e qartë nëse Perëndia është ai që i komandon jetët e tyre. Gjuha që përdorin dhe sjellja e tyre pothuajse nuk ndryshon aspak nga ajo e atyre që nuk e ndjekin Jezusin. Fuqia që Perëndia na ofron nëpërmjet Krishtit është pikërisht fuqia e ringjalljes së tij (Fil. 3:10). E megjithatë, përse nuk përjetojmë më shumë nga kjo fuqi në jetët tona të përditshme? Ndoshta kemi nevojë të akordohemi nga ana frymërore.

Nëse makina juaj nuk ndizet, atëherë e kontrolloni për të parë nëse tubat e karburantit janë bllokuar ose nëse duhet të ndërrohen kandelat. Është e njëjta gjë me jetën tonë të krishterë. A ju ka zënë pluhur Bibla? A keni kohë që nuk e përdorni aplikacionin e Biblës në telefonin tuaj? Keni nevojë për një partner të lutjes? Ndoshta keni nevojë t’i kërkoni Krishtit ta shfaqë edhe më shumë fuqinë e tij në jetën tuaj. Rritja në hirin e Perëndisë përfshin gjithashtu edhe një proces pjekjeje dhe maturie në ecjen tonë me Krishtin. Madje edhe vetë apostulli Pal e pranoi se kjo nuk ndodh brenda natës: “Jo se unë tashmë e fitova çmimin ose jam bërë i përsosur, por po e ndjek prapa se mos e kap, sepse edhe unë u kapa nga Jezu Krishti”(Fil. 3:12).—Chic Broersma

Lutje: O Zot dhe mjeshtër, të lutem më fuqizo.

Komente

komente