Meditime – 8 Qershor

Lexoni nga Mateu 5:7; 25:37-40

Të sillemi siç bën Perëndia

Lum ata që janë të mëshirshëm, sepse ata do të gjejnë mëshirë. (5:7)

Një miku im, gjatë verës, shkon në një zonë kampingu. Atje, ai takoi një çift, të cilët do t’i quajmë Miri dhe Besa. Besa kishte qenë një nënë kujdestare për fëmijë jetimë për një kohë të gjatë. Një nga fëmijët për të cilin ishin kujdesur ishte një fëmijë me nevoja të veçanta, i cili kishte lindur me varësi ndaj alkoolit dhe nikotinës. Si Miri edhe Besa kishin frikë se ai do të përfundonte sa në një shtëpi kujdestare tek tjetra, kështu që vendosën ta adoptonin. Në atë kohë Miri ishte 70 vjeç ndërsa Besa, 62. Ata hodhën një hap të madh. Tani që është katër vjeç, djali i tyre ka vështirësi në të folur dhe peshon vetëm 11 kilogram, por duket që ka përmirësim nën kujdesin e prindërve të tij.

Me anë të lumturisë së mëshirës, Jezusi nuk po na mëson të sillemi si të mëshirshëm me qëllim që të fitojmë mëshirën e Perëndisë. Kur ne tregojmë mëshirë, thjesht po veprojmë ose po sillemi si Perëndia. Fëmijët e vërtetë të Perëndisë imitojnë atin e tyre qiellor. Ata e bëjnë këtë në pavetëdije dhe pa u vetë-lavdëruar. Për Mirin dhe Besën, nuk ka kthim pas. Për ta, të ndihmojnë të tjerët është stil jetese. Besa gjithashtu ndihmon në qendrat për të pastrehët. Ndërkohë që njerëzit largohen çdo mëngjes, ajo u thotë: “Nëse gjeni ushqim gjatë ditës i cili shijon më mirë i nxehtë, atëherë ejani tek ne dhe mund ta ngrohni tek mikrovala jonë”.

Besa thotë se e ka të vështirë ta shprehë dashurinë e Perëndisë me fjalë. Por s’duhet të shqetësohemi. Shkrimi na bën thirrje: “Të mos duam me fjalë, as me gjuhë, por me vepra dhe me të vërtetë” (1 Gjo. 3:18). Besa këtë bën, dhe Jezusi e shpall atë të bekuar. Jezusi na thërret edhe ne ta vëmë dashurinë tonë në veprim dhe të jemi të bekuar.—Chic Broersma

Lutje: O Zot, hapi sytë e mi ndaj nevojave përreth.


Komente

komente