Meditime – 9 Korrik

Lexoni nga Marku 7:31-37

Të bësh çdo gjë mirë

Dhe, të habitur shumë, thoshin: “Ai çdo gjë e ka bërë mirë”. (v. 37)

Sa mënyrë e bukur për të përmbledhur shërbesën e Jezusit: “Ai çdo gjë e ka bërë mirë”. Për fat të keq, kjo nuk mund të thuhet edhe për ne. Është e vërtetë që njerëzit kanë bërë gjëra të jashtëzakonshme! Të gjithë mahnitemi kur shohim ndërtime si piramidat e Egjiptit, Koloseun në Romë apo Taxh Mahalin në Indi. Veprat e artit na mahnitin. Shpikje si vetura, aeroplani, telefoni dhe kompjuterët janë mbresëlënëse. Pra, ne njerëzit kemi bërë shumë gjëra mirë.

Por, si qenie njerëzore, ne na torturojnë problemet tona, fajet, gabimet dhe sigurisht edhe mëkatet tona. Nuk kalon një ditë pa dëgjuar për ndonjë skandal, vrasje apo dhune të ndonjë lloji. Duket se në vend që të bëjmë atë që thotë Bibla dhe atë që shfaq Zoti ynë, pra, që të duam të afërmin porsi vetveten, ne bëjmë pikërisht të kundërtën. Ne njerëzit se ç’jemi një përzierje e çuditshme e të mirës dhe të keqes. Me dhembshuri u shërbejmë ushqime të varfërve, dhe njëkohësisht abortojmë fëmijë.

Vetëm një është ai që bën mirë çdo gjë. Dhe emri i tij është Jezus. Ai është biri hyjnor i Perëndisë, i cili erdhi dhe jetoi këtu në tokë si një qenie njerëzore dhe ishte si ne në çdo gjë, përveç mëkatit. Nëpërmjet jetës, vdekjes dhe ringjalljes së tij, Jezusi bëri për ne atë që vetëm ai mund ta bënte. Ai na udhëheq përmes shembullit të tij të dashurisë dhe të dhembshurisë dhe na ofron flijimin e përsosur për mëkatet tona. Ai me të vërtetë çdo gjë e ka bërë mirë!—John Koedyker

Lutje: Faleminderit Zoti Jezus që çdo gjë e ke bërë mirë. Amen.


Komente

komente