Ai nuk e kurseu Birin e Vet

Dita 83 | Lexoni nga Psalmi 103:1-18; Romakëve 8:31-32

Sepse ai (Perëndia) që nuk e kurseu Birin e vet, por e dha për të gjithë ne, qysh nuk do të na dhurojë të gjitha gjëra bashkë me të? (Rom. 8:32)

Përfundimi i shërbesës së Kungimit në kishën time ishte fragment falënderimi, i marrë kryesisht nga Psalmi 103. Por në fund, liturgjia shtonte vargun kyç të sotëm nga Romakëve 8.

Jezusi është prova e dashurisë së Perëndisë për botën. Dikush vuri re njëherë se fjala kyç tek Gjoni 3:16 është fjala e shkurtër aq. Dashuria matet nga sa je gati që nga vetja jote të japësh për hir të të dashurit. Sipas kësaj mase, dashuria e Perëndisë është e pafund sepse Ai dha Birin e tij të vetëm për të shpëtuar botën. Më personalisht, Jezusi është prova e dashurisë së Perëndisë për ne: “Perëndia e tregon dashurinë e tij për ne në atë që, ndërsa ne ishim ende mëkatarë, Krishti vdiq për ne” (Rom. 5:8). Vdekja e Jezusit demonstron dashurinë e Perëndisë sepse Jezusi është Perëndi. Perëndia nuk dërgoi dikë tjetër të vdiste në kryq për mëkatet tona; Ai erdhi ta bënte vetë.

Ndoshta ti e di dhe e beson gjithë këtë tashmë (shpresoj që e beson!). Por a e ke menduar ndonjëherë këtë? Jezusi është edhe prova e bekimeve të ardhshme të Perëndisë. Ndiq logjikën e apostullit tek Romakëve 8:32. Perëndia tashmë e ka dhënë Jezusin për ne; a mendon se atëherë do të na mohonte ndonjë gjë tjetër që ne vërtet mund të na nevojitej apo donim?

Kur zhgënjehemi, ndonjëherë ngremë supet dhe themi: “Nuk mund t’i kesh të gjitha.” Po, mundesh, nëse i përket Jezusit — një ditë do t’i kesh të gjitha! — David Bast

Ndërsa luteni, falënderojeni Perëndinë për premtimin se një ditë do t’i keni të gjitha.