Ai që mban yjet

Dita 76 | Lexoni nga Jobi 38:19-33

A mund t’i bashkosh ti lidhjet e Plejadave apo të zgjidhësh vargjet e Orionit? (v. 31)

Si dikush që përballet përditë me ankthin, unë punoj shumë për t’u ndier sikur e kam unë kontrollin e jetës. Unë bëj lista punësh dhe heq çdo njërën prej tyre me kujdes si një shenjë që po bëj një punë të mirë. Si njeri i brishtë, mund të kthehesh te paratë, postet e punës dhe marrëdhëniet për të siguruar një ndjesi sigurie, por nëse je si unë, viti 2020 e shkatërroi tërësisht iluzionin e kontrollit ndërsa e gjithë bota përjetoi përçarjen dhe shkatërrimin e një sëmundje që vazhdonte të ndryshonte, por që ne nuk e kuptonim. Në atë pafuqinë tonë të skajshme, ne vramë mendjen: Ku është Perëndia në gjithë këtë?”

Në librin e Jobit, takojmë një njeri të drejtë, jeta e të cilit u kthye tërësisht përmbys nga shkatërrimi, sëmundja dhe humbja e madhe personale. Pyetja kryesore që e përndiqte Jobin ishte: “Ku është Perëndia në këtë vuajtje të pashpjegueshme?” Në fund të librit, Perëndia iu përgjigj drejtpërdrejt Jobit nga mesi i një furtune, në një bisedë që e ridrejtoi Jobin drejt adhurimit dhe frikënderimit.

Në pasazhin e sotëm, Perëndia tregon rendin dhe fuqinë e tij siç shpaloset në kupën qiellore, specifikisht nëpërmjet yjësive (vv. 31-33). Nuk ka rëndësi sa jashtë kontrollit mund të duken jetët tona, modelet e yjeve dhe stinët shërbejnë për të na kujtuar që Perëndia ka kontrollin e jetëve tona – edhe në kohë vuajtjesh. Me Perëndinë në kontroll, ne jemi të lirë të pushojmë në mirësinë e Tij dhe ta ndjekim udhëheqjen e Tij në vend që të mbushemi me ankth të hartojmë planet tona për sukses. – Katelyn J. Dixon

Ndërsa luteni, kërkojini Perëndisë t’ju ndihmojë të pushoni në sovranitetin e Tij sot!

#fjalëteshpresës #meditime #biblestudy #dita76