Ata që fitojnë

Dita 28 | Lexoni nga Zbulesa 2:1-11

Kujt fiton do t’i jap të hajë nga pema e jetës, që është në mes të parajsës së Perëndisë. (v. 7)

“Ku janë fitimtarët?”, dëgjova të qahej dikur bashkëshortja e pastorit, e cila po i referohej pikërisht këtij pasazhi (v. 7, 11). Ajo ishte disi e acaruar për shkak se të gjithë njerëzit që kishte përreth dukeshin sikur ishin mposhtur nga mëkati dhe shkurajimi. Por kjo është shumë ndryshe nga fitorja në të cilën na thërret Jezusi, pra, ajo fitore që u sigurua nëpërmjet vdekjes dhe ringjalljes së tij. Neve jemi të thirrur të jemi fitimtarë, madje, “më shumë se fitimtarë me anë të atij që na deshi” (Rom. 8:37). Ç’gjëra të mrekullueshme u janë premtuar atyre që fitojnë!

Letrat drejtuar kishave të Zbulesës u drejtohen në mënyrë individuale secilës kishë; çdo bashkësi kishte probleme dhe sfida të veçanta me të cilat përballej. Kisha në Efes u përgëzua për qëndrimin që mbajtën kundër herezisë, dhe për ngulmimin e tyre në veprat e mira. Mirëpo ata kishin humbur dashurinë e tyre të parë për Jezusin, dhe u duhej që të pendoheshin dhe të ktheheshin tek ai. Kisha në Smirnë u inkurajua që të qëndronte besnike ndaj Krishtit edhe në mes të përndjekjes. Ata që do të qëndronin besnikë do të merrnin “kurorën e jetës” (Zbu. 2:10), ashtu siç e lexuam dje në librin e Jakobit. Por mbi të gjitha, atyre që fitojnë u janë dhënë premtime të mrekullueshme: ata do të hanë nga pema e jetës (v. 7), dhe nuk do të dëmtohen fare nga vdekja e dytë (v. 11).

Në këto kapituj ka kaq shumë premtime të tilla. Populli i Perëndisë do të rezistojë, do të fitojë, dhe një ditë do të sundojë bashkë me Krishtin. Perëndia është besnik me fjalën e tij. — Laura N. Sweet

Ndërsa luteni, meditoni mbi këto premtime të çmuara të Perëndisë.