web-woh-13-june

13 Qershor

Lexoni nga 2 e Samuelit 12:1-14

Një akuzë tronditëse

Sepse ti e ke bërë këtë gjë fshehurazi, kurse unë do ta bëj përpara tërë Izraelit. (v. 12)

Kur i kishim fëmijët të vegjël, bashkëshorti im u mësonte atyre vargje nga Bibla duke i recituar së bashku në formën e një himni. Një nga vargjet e tyre të preferuara ishte Numrat 32:23: “Të jeni të sigurtë që mëkati juaj do t’ju gjejë”. Askush nuk ia hedh paq me asgjë – asnjëherë! Perëndia sheh dhe di gjithçka, dhe siç tha edhe Jezusi, “nuk ka asgjë . . . të fshehtë që nuk do të njihet” (Lk. 12:2).

Davidi dhe Bathsheba kishin marrë hapa për ta mbuluar mëkatin e tyre, dhe me kalimin e kohës, lindi edhe djali i tyre. Por me siguri disa njerëz e dinin sekretin, dhe mund të ketë pasur pëshpërima mes shërbëtorëve, ndërkohë që kishte të tjerë që mund ta tallnin mbretin e tyre “të drejtë”. Perëndia dërgoi profetin Nathan për ta ballafaquar Davidin me mëkatin e tij. Historia që Nathani tregoi rreth pasanikut që kishte shumë dele, i cili ia mori dhe ia vrau të vetmin qengj të vogël që një i varfër kishte për zemër, ishte tepër shqetësuese. Por sapo Davidi kërkoi vdekjen e këtij pasaniku, Nathani e akuzoi atë për po të njëjtin krim! Davidi kishte marrë bashkëshortin e Uriahut dhe pastaj kishte organizuar vdekjen e tij. Me mëkatin e tij ai ishte treguar mospërfillës ndaj Perëndisë së Izraelit, i cili e kishte bërë atë mbret.

Mëkati i Davidit dhe Bathshebës ishte ekstrem dhe i kishte sjellë poshtërim publik emrit të Perëndisë. Kundërpërgjigja e Perëndisë do t’u tregonte atyre, dhe Izraelit, se sa seriozisht e merrte ai këtë mosbindje. Nathani i tha Davidit se i biri i tij i pafajshëm do të vdiste. A do t’u tregonte Perëndia atyre mëshirë? A do të kishte hir apo falje për Davidin dhe Bathshebën? Po për djalin e tyre? — Laura N. Sweet

Ndërsa luteni, falënderoni Perëndinë për hirin dhe mëshirën që janë tonat në Krishtin Jezus.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-12-june

12 Qershor

Lexoni nga 2 e Samuelit 11:14-27

Një veprim vrastar

Ajo që Davidi kishte bërë nuk i pëlqeu ZOTIT. (v. 27)

“Por secili tundohet i tërhequr dhe i ndjellur nga dëshirimi i vet”, na paralajmëron Jakobi tek Dhjata e Vjetër. “Pastaj dëshirimi, si mbarset, pjell mëkatin dhe mëkati, si të kryhet, pjell vdekjen” (Jak. 1:14-15). Në fund, mëkati të çon edhe në vdekjen frymërore edhe në atë fizike. Ndërkohë që Davidi përpiqej të mbulonte mëkatin e vet, ai ju fut një “valleje” që të çonte në më shumë mëkate dhe në vdekjen e një njeriu të pafajshëm.

Kur Sauli dëshironte ta hiqte qafe Davidin, ai u përpoq t’i ujdiste rrethanat në atë mënyrë që Davidi të mund të vritej në betejë. Në një paralelizëm të frikshëm, tani edhe Davidi bëri të njëjtën gjë duke i kërkuar Joabit, komandantit të tij, që ta caktonte Uriahun në kulmin e betejës ku ai me siguri do të vritej. Plani funksionoi dhe Uriahu nuk ishte më një problem për Davidin dhe Bathshebën. Davidi lëvizi me shpejtësi; sapo mbaroi periudha e zisë nga ana e Bathshebës (me shumë mundësi rreth shtatë ditë), Davidi u martua me të, në mënyrë që lindja e foshnjës nuk do të nxirrte në pah kurorëshkeljen e tyre. Mirëpo edhe pse çifti mund t’u kishte shpëtuar akuzave zyrtare, Perëndia ishte në dijeni të veprimit vrastar, dhe atij nuk i pëlqeu ajo që kishte bërë Davidi.

A vajtoi Bathsheba për Uriahun, bashkëshortin e saj? A pati ndonjë brejtje të ndërgjegjes për veprimet e saj? Nëse nuk po vajtonte vdekjen e tij, do të vajtonte shumë shpejt. Kishte ende shumë pasoja të mëkatit të tyre që nuk kishin ardhur ende. — Laura N. Sweet

Ndërsa luteni, i kërkoni Perëndisë t’ju tregojë për ndonjë dëshirë të paperëndishme që mund t’ju çojë në mëkat.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-11-june

11 Qershor

Lexoni nga 2 e Samuelit 11:1-13

Një lidhje kurorëshkelëse

Davidi dërgoi lajmëtarë për ta marrë; kështu ajo erdhi tek ai. (v. 4)

Ngjarja e Davidit dhe Bathshebës është një nga historitë më të famshme në Shkrim. Ajo fokusohet tek Davidi dhe tek veprimet e tij, dhe ashtu duhet të jetë, meqë Davidi është një figurë kryesore në Shkrim, dhe një nga paraardhësit e Jezusit. Mirëpo ndërsa i shohim këto ngjarje, do të marrim në konsideratë edhe rolin e Bathshebës, dhe do të shohim se ku Perëndia i tregon asaj hir dhe restaurim.

Davidin e tërhoqi bukuria e Bathshebës dhe e thirri atë në shtëpinë e tij. Davidi veproi në bazë të dëshirave të tij dhe ata të dy kryen marrëdhënie. A ishte Bathsheba pjesëmarrëse me dëshirën e saj? Nuk e dimë. Padyshim Davidi kishte shumë pushtet mbi të, megjithatë nuk kemi asgjë që të tregojë që ajo bëri rezistencë, dhe autori i 2 e Samuelit e bën zakonisht të qartë kur është rasti (shih kapitullin 13). Më vonë, mesazhi i thjeshtë i saj për Davidin, “Jam me barrë” (v. 5), tregon gatishmërinë e saj për ta lënë atë ta zgjidhte këtë situatë; ajo besonte se Davidi do ta mbronte. Rreziku ishte shumë i madh; sipas ligjit të Moisiut, si Davidi edhe Bathsheba mund të dënoheshin me vdekje për krimin e kurorëshkeljes (Lev. 20:10).

Përpjekja e parë e Davidit për ta mbuluar mëkatin e tij dështoi kur Uriahu, bashkëshorti i Bathshebës, refuzoi të shkonte në shtëpi e të flinte me gruan e tij. A e kuptoi Bathsheba rrezikun me të cilin përballej bashkëshorti i saj tani, për shkak të tradhtisë së saj bashkëshortore? Rezultati i atij mëkati të vetëm do të vazhdonte të përhapej derisa të prekeshin edhe jetë të tjera të pafajshme. — Laura N. Sweet

Ndërsa luteni, kërkoni pendim për çdo mëkat personal që mund të ndikojë tek të tjerët në jetën tuaj.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-10-june

10 Qershor

Lexoni nga 1 e Samuelit 25:32-44

Një korrigjim i marrë parasysh

E bekuar qoftë këshilla jote dhe e bekuar qofsh ti që më pengove sot të derdh gjak. (v. 33)

Si përgjigjeni ju kur dikush ju ofron një fjalë korrigjimi? Shpeshherë reagimi ynë i parë është që të debatojmë ose të mbrojmë vetveten nga ajo që e perceptojmë ndoshta si një sulm ndaj nesh. Mirëpo Fjalët e Urta 9:8 thotë: “Qorto të urtin dhe ai do të të dojë”. Shohim se ky ishte pikërisht lloji i reagimit që pati Davidi në këtë takim me Abigailin.

Davidi e dalloi menjëherë që Perëndia po i përdorte fjalët dhe veprimet e Abigailit për ta frenuar atë nga qëllimet e tij të dhunshme kundër Nabalit. “Po të mos ishe nxituar të më dilje përpara, në të gdhirë të ditës Nabalit nuk do t’i kishte mbetur asnjë njeri i gjallë” (v. 34). Davidi zgjodhi t’i vinte veshin këshillës së Abigailit dhe në vend që të merrte hak me duart e tij, ai lejoi Perëndinë të merrej me Nabalin. Dhe Perëndia u mor me të! Të nesërmen pasi i doli pija, Abigaili i tregoi Nabalit në lidhje me Davidin dhe njerëzit e tij dhe se sa afër shkatërrimit kishte qenë. Kur e dëgjoi këtë, zemra e tij u ligështua, dhe dhjetë ditë më vonë “ZOTI e goditi Nabalin dhe ai vdiq. (v. 38). Davidi e kuptoi se kjo ishte drejtësia e Perëndisë: “ZOTI bëri që të bjerë mbi kokën e tij ligësia e Nabalit” (v. 39).

Në fund, Abigali dhe Davidi u martuan, një fund ky shumë herë më i mirë nga ai që kishte planifikuar Davidi! Reagimi i Davidit ndaj korrigjimit të butë të Abigailit i solli atij paqe, dhe gjithashtu i solli atij një grua të perëndishme, plot hijeshi dhe me gjykim të shëndoshë. — Laura N. Sweet

Ndërsa luteni, i kërkoni Perëndisë urtësi dhe përulësi kur të keni nevojë për korrigjim.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-9-june

9 Qershor

Lexoni nga 1 e Samuelit 25:23-31

Një përgjërim imponues

ZOTI të ka penguar të derdhësh gjak dhe të vendosësh drejtësi me duart e tua. (v. 26)

Kur vizitova monumentin e Linkolnit në qytetin e Uashingtonit, më bënë shumë përshtypje kolonat e mëdha prej mermeri dhe statuja e ulur 5.8 metër e lartë e Abraham Linkolnit. Vërtetë madhështore! Mirëpo ajo që më trazoi përbrenda ishin vetë fjalët e Linkolnit të gdhendura në muret e memorialit. Në fund, nuk ka monument më të mirë për urtësinë dhe madhështinë e Linkolnit sesa vetë fjalët e tij.

Në pasazhin e sotëm, ne lexojmë vetë fjalët e Abigailit drejtuar Davidit, dhe ato shërbejnë si një monument për natyrën e saj të hirshme, urtësinë depërtuese dhe besimin e saj. Ajo i tha Davidit se mund të fajësonte atë për ofendimin, dhe që Nabali ishte një njeri i marrë, dhe nuk ia vlente të merrej në konsideratë. Ajo foli për fitoret e Davidit në betejë, madje duke iu referuar edhe vdekjes së Goliathit, duke thënë se Perëndia do t’i flakë armiqtë e tij “si nga zgavra e një hobeje” (v. 29). Gjithashtu Abigaili i tha Davidit se ajo besonte që Perëndia po e përdorte atë për ta frenuar dorën e tij; një ditë Davidi do të bëhej mbret, dhe kjo dhunë e panevojshme nuk do të bëhej shqetësim për të nëse do ta ndryshonte mendjen në lidhje me vrasjen e Nabalit. Përgjatë gjithë fjalimit të saj, Abigaili foli me respekt dhe me ton pajtues. Dhuratat e saj ishin bujare dhe ajo ishte gjithçka që Nabali nuk ishte.

Abigaili e dinte se ajo po i bënte thirrje një njeriu të perëndishëm, një burrë që nuk ishte i dhënë pas gjakderdhjes së panevojshme. Besimi i saj tek Perëndia dhe tek udhëheqësi që ai kishte vajosur, i dhanë asaj kurajën për të qenë një paqebërëse në një situatë të rrezikshme, dhe fjalët e saj shpëtuan shumë vetë atë ditë. — Laura N. Sweet

Ndërsa luteni, i kërkoni Perëndisë t’ju japë fjalë që janë të hirshme dhe me ton pajtues.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-8-june

8 Qershor

Lexoni nga 1 e Samuelit 25:14-22

Një grua e vendosur

Dije dhe shiko atë që duhet të bësh, sepse ka për t’i ngjarë ndonjë fatkeqësi zotit tonë [Nabalit] dhe tërë shtëpisë së tij. (v. 17)

Cilët do të rendisnit ju në një listë me heronj biblikë që kanë treguar guxim dhe besim të madh? Padyshim lista do të përfshinte Gedeonin, i cili sulmoi mijëra midianitë me vetëm 300 burra (Gjyqtarët 7). Ose ndoshta edhe Sansonin, i cili goditi filistejtë me thjesht një nofull gomari (Gjyqtarët 15). Le t’i shtojmë kësaj liste edhe Abigailin, e cila nxitoi t’u dilte përpara një grupi të inatosur luftëtarësh me shpata prej 400 burrash, pa pasur asnjë shpatë dhe as nofull, por vetëm disa ushqime! Kjo me të vërtetë që ishte kurajë!

Abigaili nuk i kishte parë burrat që kishte dërguar Davidi drejt bashkëshortit të saj, por një nga shërbëtorët e njoftoi atë shpejt e shpejt në lidhje me rrezikun që u kanosej të gjithëve. Nabali kishte fyer Davidin, këtë njeri të fuqishëm, ndjekësit e të cilit kishin mbrojtur, pa qenë përgjegjësia e tyre, tufat dhe barinjtë e tij. Fatkeqësia po afrohej, dhe Abigaili duhet të vepronte me shpejtësi! Ajo mblodhi me vrap një sasi të mirë ushqimesh, ngarkoi gomerët dhe doli të takohej ballë për ballë me fatkeqësinë. Nëse do ta zbuste Davidin, jo vetëm që do të mbronte bashkëshortin e saj, por gjithashtu do ta parandalonte Davidin nga një dhunë për të cilën do të pendohej më vonë.

Nuk pati asnjë hezitim nga ana e Abigailit. Ajo nuk foli me Nabalin, dukshëm duke rënë dakord me shërbëtorin se ai ishte “një njeri aq i keq sa nuk mund t’i flasësh” (v. 17). Ajo shkoi përpara me guxim, duke besuar se Perëndia do ta përdorte atë për të shmangur tragjedinë. — Laura N. Sweet

Ndërsa luteni, i kërkoni Perëndisë kurajën për të vepruar shpejt me urtësi dhe maturi kur të jetë e nevojshme.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-7-june

7 Qershor

Lexoni nga 1 e Samuelit 25:1-13

Një burrë gjaknxehtë

Por Nabali iu përgjigj shërbëtorëve të Davidit, duke thënë: “Kush është Davidi dhe kush është biri i Isait?”. (v. 10)

Në faqen e parë të veprës klasike të Çarls Dikensit, “Një këngë Krishtlindjeje”, autori e përshkruan personazhin Ebenizër Skruxh si “një mëkatar të vjetër ziliqar që shtrëngonte, ndrydhte, kapte, gërricte, mbërthente!”. Dikensi e dinte se nëse lexuesit do të angazhoheshin me romanin e tij, ata duhet patjetër ta njihnin personazhin kryesor. Skruxh-i ishte një plakush i poshtër koprrac, i cili kishte nevojë të dëshpëruar për t’u shpenguar.

Edhe autori i librit të 1 e Samuelit bën pak a shumë të njëjtën gjë ndërkohë që na prezanton me Nabalin, një burrë i pasur që ishte “i ashpër dhe i keq në veprimet e tij” (v. 3). Gjatë kësaj kohe, Davidi dhe ndjekësit e tij vazhdonin të ishin në arrati nga mbreti Saul dhe jetonin në shkretëtirë. Ata kishin zënë shoqëri me barinjtë e Nabalit dhe i kishin mbrojtur tufat e tij nga hajdutët dhe kafshët e egra. Tani që kishte ardhur koha e festës dhe e qethjes së deleve, Davidi dërgoi burrat e tij që, me përulësi, të kërkonte t’i njihej shërbimi që kishte bërë. Mirëpo Nabali refuzoi ta bënte këtë dhe përkundrazi e fyeu Davidin, duke thënë se ishte një copë askushi, i cili ishte larguar nga zotëria i tij (v. 10). Kjo përgjigje e pahijshme e inatosi Davidin dhe e shtyu atë të merrte masa kundër Nabalit.

Ndryshe nga bashkëshorti i saj, Abigaili na përshkruhet si “një grua me gjykim të shëndoshë dhe e hijshme” (v. 3). Duke qenë e martuar me një burrë si Nabali, ajo mund të kishte qenë e zemëruar dhe të mbante mëri, ose e hidhëruar si Mikali. Mirëpo, do të shohim nga veprimet e saj që ajo ishte e mençur, e hirshme dhe zemërgjerë. Çfarë kontrasti në krahasim me bashkëshortin e saj! — Laura N. Sweet

Ndërsa luteni, i kërkoni Perëndisë t’ju ndihmojë të jeni më shumë si Abigaili dhe jo si Nabali.

#fjalëteshpresës #kishashqiptare #ungjillorëtshqiptare #meditime #app #ios #android

web-woh-6-june

6 Qershor

Lexoni nga 2 e Samuelit 6:12-23

Një femër e hidhëruar

[Mikal] pa mbretin David që po hidhej dhe kërcente përpara ZOTIT dhe e përçmoi në zemrën e saj. (v. 16)

Libri i Hebrenjve ka goxha këshillë të mirë për Mikalin: “Duke u kujdesur që . . . mos mbijë ndonjë rrënjë e hidhur dhe t’ju turbullojë dhe me anë të saj të ndoten shumë njerëz” (Heb. 12:15). Në kohën kur Izraeli kishte një gëzim të madh, për shkak se arka e besëlidhjes u soll në Jerusalem, Mikal e shkëputi veten nga populli i saj dhe kremtimi i tyre. Pasazhi i sotëm është hera e fundit që lexojmë për të në Bibël, një femër e hidhëruar, e vetmuar dhe me sa duket e larguar nga bashkëshorti i saj.

I veshur me një efod të thjesht prej liri (siç ishte rroba që vishnin priftërinjtë), Davidi e udhëhoqi popullin e tij në adhurim dhe në kremtim ndërkohë që në qytet hynte arka, që përfaqësonte praninë e Perëndisë. Mikal nuk ishte pjesë e këtij kremtimi; ajo shikonte nga dritarja, pa u prekur aspak nga këngët dhe vallet. Më vonë, fjalët sarkastike që i tha Davidit në lidhje me mungesën e tij të dinjitetit përpara popullit të vet, treguan se ajo nuk e kishte kuptuar as rëndësinë e arkës, e as dashurinë dhe përkushtimin e bashkëshortit të saj ndaj Perëndisë së Izraelit. Reagimi i saj nuk ishte thjesht neveria që ndjeu për kërcimin! Por vinte nga një zemër e hidhur, dhe kjo e përjashtoi atë nga gëzimi dhe bekimi që edhe ajo mund të kishte pasur.

Nëse hidhërimi na lëndon dhe na ndan nga të tjerët, atëherë padyshim pendimi dhe falja mund të na restaurojë. Falja e tillë nuk është e lehtë, mirëpo është e vetmja rrugë drejt paqes dhe gëzimit. — Laura N. Sweet

Ndërsa luteni, i kërkoni Perëndisë t’ju ndihmojë të falni çdo person karshi të cilit keni qenë të hidhur.

#fjalëteshpresës #kishashqiptare #ungjillorëtshqiptare #meditime #app #ios #android

5 jun

5 Qershor

Lexoni nga 2 e Samuelit 3:12-21

Një gur shahu politik

Kam diçka për të të kërkuar, ti nuk do të ma shohësh fytyrën po nuk më solle më parë Mikalin, bijën e Saulit, kur të vish. (v. 13)

Ne e kemi të lehtë të ndjejmë keqardhje për Mikalin. Ajo u përdor si një gur shahu politik nga babai i saj për të qenë një “lak” për Davidin (shih 1 Sam. 18:21). Më pas ajo u nda nga bashkëshorti që donte për shkak të qëllimeve vrastare të Saulit, dhe pastaj e martuan me një burrë tjetër. Tani që Sauli kishte vdekur, Davidi kishte ardhur në fron si mbreti i Judës, dhe Abneri, gjenerali i vjetër i Saulit, donte që ta bënte atë mbret mbi gjithë Izraelin. Pikërisht në këtë kuadër vjen kërkesa e Davidit që të restaurojë marrëdhënien me bashkëshorten e tij të parë, Mikalin.

Por a ishte kjo thjesht një lëvizje politike nga ana e Davidit? Padyshim të qenit i martuar me vajzën e ish mbretit e ndihmoi atë të pretendonte fronin. Mirëpo veprimet e Davidit kundrejt shtëpisë së Saulit ishin gjithmonë me respekt. (Shihni trajtimin që i bën Mefiboshethit tek 2 e Samuelit 9). Davidi dhe Mikali ishin prej vitesh të ndarë por nuk ishin divorcuar kurrë. Në mendjen e Davidit, ajo vazhdonte të ishte bashkëshortja e tij dhe duhet të rivendosej pranë tij, në vendin e saj të nderit. Ajo nuk ishte thjesht një gur shahu, por një anëtare e humbur e familjes së tij.

A i kishin bërë padrejtësi dhe a ishte keqtrajtuar Mikali? Patjetër! E manipuluar, e viktimizuar, e pafuqishme, zemra e saj ishte një tokë pjellore ku hidhësia të zinte rrënjë. Mirëpo ishte Sauli, babai i saj, dhe jo Davidi, ai që e kishte përdorur atë për qëllimet e veta. Njerëzit bëjnë zgjedhje, dhe si rrjedhojë Mikali filloi të kishte zët një person në veçanti. — Laura N. Sweet

Ndërsa luteni, i kërkoni Perëndisë t’ju zbulojë çdo rrënjë hidhësie që gjendet në zemrën tuaj.

#fjalëteshpresës#kishashqiptare#ungjillorëtshqiptare#meditime#app#ios#android

4 jun

4 Qershor

Lexoni nga 1 e Samuelit 19:4-18

Një grua e shkathët

Por Mikal, bashkëshortja e Davidit e njoftoi për këtë gjë, duke thënë: “Në rast se sonte nuk gjen një vend strehimi, nesër ke për të vdekur”. (v. 11)

Gjenerali i lashtë kinez, Sun Cu, ka marrë meritën për thënien: “Mbaji miqtë afër, mbaji armiqtë akoma më afër”. Për fatin e keq të Davidit, edhe miqtë edhe armiku i tij ishin nga e njëjta familje! Pasi qëllimet e mbretit kundër Davidit dolën në shesh, dy prej fëmijëve të Saulit u angazhuan që ta mbrojnë atë. Megjithatë, përqasjet e tyre për ta shpëtuar Davidin ishin shumë të ndryshme.

Jonathani, djali i Saulit, ishte një njeri i drejtë dhe i sinqertë. Ai i foli drejtpërdrejtë mbretit dhe i bëri thirrje të mos e vriste Davidin. Sauli hoqi dorë për një farë kohe, mirëpo pas fitoreve të Davidit në fushëbetejë, Sauli i përtëriu sërish qëllimet e tij për ta vrarë. Kur Mikali, vajza e Saulit kuptoi se shtëpia e tyre po përgjohej, ajo i bëri thirrje Davidit t’ia mbathte nga dritarja. Ajo e inskenoi dhomën për t’u dukur sikur Davidi po flinte dhe u tha vrasësve të tij se ai ishte sëmurë. Kur komploti u zbulua, Mikali e gënjeu përsëri babanë e saj. Ndërkohë, Davidi i mbathi i sigurt dhe filloi jetën e tij në arrati.

Sinqeriteti i Jonathanit dhe mashtrimi i Mikalit buruan si rrjedhojë e dashurisë për Davidin, mirëpo në fund të fundit, vetëm Perëndia mund ta çlironte atë nga Sauli. Davidi do të kalonte shumë vite në arrati, dhe Mikali do të ndahej prej tij gjatë asaj kohe. Sa gjëra do të ndryshonin përpara se ta shihnin njëri-tjetrin përsëri? Çfarë do t’u servirte e ardhmja atyre? — Laura N. Sweet

Ndërsa luteni, mbajini sytë vetëm tek Perëndia për çlirim dhe për drejtim për të ardhmen.