Barrët e farisenjve

Dita 22 | Lexoni nga Luka 11:37-54

Dhe ia tha: “Mjerë edhe ju, o mësues të ligjit! Sepse i ngarkoni njerëzit me barrë që me vështirësi barten”. (v. 46)

Tek libri i Predikuesit dhe tek Psalmi 73 ne pamë dy shembuj të sfilitjes nga Dhjata e Vjetër. Ndërsa kalojmë tani tek Dhjata e Re, do të zbulojmë që sfilitja është e lidhur ngushtë me idenë e barrëve, pra, të qenit “i rënduar” shpirtërisht nga shumë shqetësime. Në kohën e Jezusit, farisenjtë dhe mësuesit e ligjit kishin shtuar ligje dhe tradita përtej atyre që gjenden në Bibël, të cilat po i ngarkonin njerëzit me barrë dhe po pengonin shpirtin e tyre; Jezusi i demaskoi dhe i ballafaqoi për mësimet e tyre.

Jezusi ishte duke ngrënë darkë me një farise kur ky grup iu kthye me kritika që nuk ishin larë përpara darkës. Kjo ishte një nga traditat e farisenjve, nuk ishte një urdhërim nga Ligji. Ndërkohë që Jezusi diskutonte këto mësime, ai i akuzoi farisenjtë se po e ngarkonin popullin e Perëndisë me rregulla dhe ceremoni shtesë. Dhe jo vetëm që i sfilitnin të tjerët me detyrime shtesë, por vetë ata nuk lëviznin as gishtin për t’i ndihmuar! Ata e kishin marrë “çelësin e njohurisë” (v. 52) e cila do t’i çonte në shpëtim, dhe i kishin penguar ata që do të hynin në mbretërinë e Perëndisë.

Kjo ishte një padi e tmerrshme ndaj krerëve fetarë të kohës së Jezusit, dhe ata e ndjenë atë. Kështu që e ndoqën nga pas, e bombarduan me pyetje dhe u përpoqën ta zinin në grackë me argumentet e tyre. Mirëpo Jezusi kishte një synim tjetër ndërkohë që u largua nga ky debat. Shpëtimtari ynë po kërkonte të hiqte barrët e atyre që ishin të munduar e të rënduar, pra, njerëz si puna ime dhe si ju. — Laura N. Sweet

Ndërsa luteni, i sillni tek Jezusi shqetësimet dhe barrët që ju rëndojnë sot zemrën tuaj.