Besëlidhje yjore

Dita 77 | Lexoni nga Zanafilla 15:1-21

Vështro me kujdes qiellin dhe numëro yjet, në rast se mund t’i numërosh. (v. 5)

Si një vajzë e re, e cila kishte qejf ta shikoja qiellin e natës, unë i vesha muret dhe tavanin e dhomës sime të gjumit me yjet që vezullonin në errësirë. Këta yje plastikë shiteshin me pako 50 apo 100-copëshe, që mua më dukeshin të panumërueshme ndërsa kaloja orë të tëra duke zgjedhur vendin e përsosur për secilin yll dhe i ngjitja pas murit me pika të vogla vinovili. Mezi prisja të binte nata jashtë, që të mund t’i shikoja të vezullonin në dhomën time me atë ndriçimin ngushëllues gjatë natës. Çdo mëngjes, pashmangshmërisht, gjeja yje në dysheme që kishin rënë ndërsa unë flija. U kthye në një punë që s’kishte fund për t’i mbajtur yjet në qiellin tim, por punë që mua më pëlqente shumë.

Duket se Perëndia është i lumtur t’i mbajë yjet në qiell për ne – edhe pse nuk besoj se Ai ka vështirësi si unë dikur që t’i mbajë në vendin e tyre. Perëndia i krijoi yjet dhe i shënoi ata si shenja të besnikërisë së tij që nga fillimi, ndaj nuk duhet të habitemi që Perëndia i përdor yjet si dëshmitarë të bëselidhjes së tij me Abramin.

Në pasazhin e sotëm nga Bibla, Perëndia e fton Abramin t’i ngrejë sytë nga qielli dhe t’i numërojë yjet, nëse mundet, duke premtuar që t’i bëjë trashëgimtarët e Abramit dhe të Sarës aq të shumtë në numër sa edhe yjet në qiell dhe t’u japë atyre një atdhe të përhershëm. Falë Jezusit, tani ne jemi bijtë e Perëndisë. Historia e besnikërisë së Perëndisë ndaj Abramit dhe fëmijëve të tij është edhe historia jonë – ne jemi yjet në qiellin e Abrahamit. – Katelyn J. Dixon

Ndërsa luteni, falënderojeni Perëndinë që ju solli në familjen e Tij dhe ju dha një shtëpi të përjetshme me Të!

#fjalëteshpresës #meditime #biblestudy #dita77