Çfarë është dyshimi?

Dita 21 | Lexoni nga: Mateu 26:36-46

“Ati im, në qoftë se është e mundur, largoje prej meje këtë kupë; megjithatë, jo si dua unë, por si do ti”. (v. 39)

Rrënja e idesë së dyshimit është të jesh ndërdyshas. Të dyshosh do të thotë të kesh një mendje me mëdyshje, një mendje që është e dyzuar mes besimit dhe mosbesimit. Thomai kishte një mendim për identitetin e Jezusit: “Zoti im dhe Perëndia im!” Turma rreth kryqit kishte një mendim për falsitetin e pretendimeve të Jezusit. Në kontrast, dyshim është të kesh dy mendime për Jezusin. A është kjo ajo që shohim në majë të malit te Mateu 28?

G. K. Chesterton mendonte se Jezusi përjetoi dyshim në Gjetsemani për shkak të mënyrës si u lut. Por nuk është kjo mënyra si e përshkroi Jezusi mendjen e Tij. Ai foli për dhimbjen dhe mundimet, për të qenit i drobitur dhe në agoni. Jezusi ishte i frikësuar. Ajo që ne e quajmë dyshim ndonjëherë është frikë. Tmerri i asaj që po ndodh nuk e dyzon mendjen tonë. E bën atë që të lëkundet nga frika.

Herë të tjera, ajo që duket si dyshim është thjesht një pikëpyetje. Lexoni me kujdes historinë e Jobit dhe do të zbuloni se ai nuk dyshoi te Perëndia. Por me siguri pati disa pyetje sfiduese për Perëndinë. Jobi nuk pati një dyshim që lëkundej midis besimit dhe mosbesimit. Ai pati një besim që kërkonte të kuptonte.

Kjo mund t’i jap shpjegim këtyre dishepujve, por dhe neve. Edhe pse ata besuan te Jezusi si Zot dhe Perëndi, sërish mund të kenë qenë të mbushur me pyetje për atë që kishte ndodhur dhe me frikë për atë që mund të ndodhte. Ndonjëherë, nuk kemi një mendje të dyzuar, por një mendje të trazuar dhe një mendje që kërkon. — Stan Mast

Ndërsa luteni, kërkojini Perëndisë që të hetojë zemrën tuaj dhe t’ju ndihmojë të njihni veten.

#fjalëteshpresës #meditime #dita20 #biblestudy