Dashuria

Dita 64 | Lexoni nga Galatasve 5:22-23; Gjoni 13:31-35

Por fryti i Frymës është dashuria. (v. 22)

Fryti i parë i Frymës është dashuria, që përsërit referenca të tjera në Shkrim për rëndësinë e dashurisë – për shembull, “mbeten besimi, shpresa dhe dashuria, por më e madhja nga këto është dashuria” (1 e Korintasve 13:13) dhe “ne e duam atë, sepse ai na deshi i pari” (1 e Gjonit 4:19).

Në shënimet e tij për letrën e Galatasve, Xhon Uesli e quajti dashurinë “rrënjën e gjithë të tjerave”. Po, vështirë të imagjinosh ndonjë fryt tjetër pa qenë dashuria e pranishme fillimisht. Kur vjen puna te jetesa sipas Frymës në vend që të jetojmë sipas mishit, dashuria është e para në radhë për të pastruar një rrugë drejt marrëdhënieve të ripërtërira me veten dhe të tjerët. Rruga për të dalë nga vetëshkatërrimi ndjek shtegun e dashurisë.

Vargjet e një kënge të njohur të Bitëllsave na sugjerojnë që “keni nevojë vetëm për dashuri”. Ndoshta vetëm për atë kemi nevojë (po të supozojmë që është dashuria e duhur). Kur vjen puna te frytet e Frymës, nuk marrim vetëm dashurinë. Shumë gjëra vijnë nga dashuria. Dashuria hyjnore sjell një të korrë më të bollshme. Mendoni pak për historinë te Mateu për pagëzimin e Jezusit në lumin Jordan, ku zëri i Perëndisë e shpalli Jezusin Birin e Tij të dashur (Mateu 3:13-17). Fakti që Jezusi ishte Biri i dashur lulëzoi në një mision dhe shërbesë që e solli frytin e Frymës në plotësinë e vet. Nëse po kërkoni frytin e Frymës në jetën tuaj, pyesni më parë nëse e keni përqafuar identitetin tuaj si bij të dashur të Perëndisë. Po? Atëherë, besoni që kjo dashuri do të sjellë një rritje të re. – Jessica Bratt Carle

Ndërsa luteni, kërkojini Perëndisë të vazhdojë të zhvillojë më shumë dashuri në ju!

#fjalëteshpresës #meditime #biblestudy #dita64