Dhe do t’ju japë paqe

Dita 82 — Lexoni nga: Numrat 6:22-27

“Ju do t’i bekoni kështu bijtë e Izraelit…” (v. 23)

Në romanin “Luani, shtriga dhe garderoba,” C. S Lewis na prezanton me Narnian, një botë e mallkuar ku ka gjithmonë dimër, por kurrë Krishtlindje. Shpëtimtari i asaj bote, Aslani, e tregon mbërritjen e tij duke shpallur Krishtlindjen. Personazhet kryesore të librit, katër fëmijë, marrin dhurata: “Një bori, një shpatë, një hark dhe një shishe. Këto dhurata janë të reja dhe risi, por domethënia e tyre e plotë zbulohet shumë më vonë. Në veçanti, boria ka fuqinë që të kërkojë ndihmën e Aslanit.

Nëse keni shkuar ndonjëherë në një kishë të krishterë, ka mundësi të keni dëgjuar disa nga fjalët te Numrat 6. Vargjet 24-26 formojnë “Bekimin e Aronit” (emëruar sipas kryepriftit Aron). Ato ende thuhen në mbyllje të shumë shërbesave të adhurimit. Edhe nëse bekimi është i ri për ju, ose risia është venitur ngaqë i keni dëgjuar pafund, mbase nuk e vlerësoni plotësisht domethënien e tyre. Iu dha priftërisë izraelite drejtpërdrejt nga “Yahweh”. Këto janë fjalët e Perëndisë për bekimin e popullit të Perëndisë. “Yahweh” thotë: “Kështu do ta vënë emrin tim mbi bijtë e Izraelit dhe unë do t’i bekoj” (v. 27).

Te Numrat 6, Perëndia bën dy premtime mbresëlënëse. Së pari, Ai premton praninë e Tij sa herë që emri i Tij i vërtetë, “Yahweh”, thuhet. Së dyti, Ai i premton popullit të Tij paqe. Fjala hebraike që ne e përkthejmë “paqe” është fjala “Shalom”. Është më shumë se një mendje në paqe dhe një zemër e qetë. Shalom do të thotë ripërtëritje e jetës ashtu siç e ka patur për qëllim Perëndia. Ne ende mund ta thërrasim Perëndinë me emrin e Tij të vërtetë: “Jezus. Prania e Tij është paqja jonë. — Ben Van Arragon

Ndërsa luteni, besojini pranisë plot paqe të Jezusit.