Dishepulli që e mohoi Atë

Dita 15 | Lexoni nga Mateu 26:31-35, 69-75

Dhe në atë çast këndoi gjeli. (v. 74)

Shumë nga njerëzit që e mirëpritën Jezusin duke thirrur: “Hosana” të Dielën e Palmave duhet të kenë bërtitur edhe “Kryqëzoje!” të Premten e Mirë. Është shumë e lehtë të tradhtosh apo të mohosh Krishtin, mjafton vetëm që të bëhemi pjesë e turmës.

Pasi e mohoi në oborrin e kryepriftit, Pjetri mund të kishte vazhduar me ta duke e refuzuar Zotin dhe kushedi se si do të kishte përfunduar kjo. Por pastaj, ndodhi një gjë e vogël, në dukje e zakonshme. Ai dëgjoi gjelin të këndonte. Nuk ishte e jashtëzakonshme, ishte krejtësisht e zakonshme, por ai zë i vogël ishte thirrja e zgjimit për Pjetrin. Shpirtin e tij e shponte paralajmërimi i Jezusit (v. 34) dhe ai doli jashtë dhe qau me lot të hidhur pendimi.

Kënga e gjelit ishte një zë i hirit. E dini se si shkon kur ne ngecim në mëkat. Ne e mbytim ndërgjegjen tonë derisa ajo më në fund bie në heshtje. Bëhemi të pandjeshëm ndaj fajit, të vërtetës, madje dhe ndaj Perëndisë. Por pastaj, diku, disi, dëgjojmë gjelin të këndojë. Mbase është në një predikim, apo përmes një komenti në bisedë me një mik, apo një varg nga Shkrimi, apo vargu i një kënge, apo një kujtim i vjetër, që papritmas kalon nëpër mendjen tonë. Çfarëdo qoftë, diçka e ngjall sërish ndërgjegjen tonë dhe ne e kuptojmë se çfarë kemi bërë.

Nëse dëgjoni zërin e një gjeli në jetën tuaj, mos e shpërfillni. Dallojeni në atë çast zërin e Zotit, thirrjen për t’u penduar. Mund të jetë një zë i ulët, por përmes gjërave të tilla shpëtohen shpirtrat. — David Bast

Ndërsa luteni, kërkojini Perëndisë t’ju ndihmojë të dëgjoni zërin e Tij në gjëra të vogla.

#fjalëteshpresës #meditime #biblestudy #dita15