Durimi

Dita 67 | Lexoni nga Galatasve 5:22-23; Kolosianëve 3:12-15

Por fryti i Frymës është… durimi. (v. 22)

Askush nuk e reklamon një telefon inteligjent, një kompjuter apo një tablet si “i këndshëm dhe i ngadaltë”. Çdo pajisje e re teknologjike është më e shpejtë se e fundit. Si rrjedhojë, sensi ynë për gjërat që janë “të ngadalta” dhe “të shpejta” bëhet lëmsh. Kur ka raste që e kapim veten duke psherëtirë në padurim me një faqe që kërkon disa sekonda për t’u ngarkuar ose kur kërcasim këmbët nxitimthi ndërkohë që presim në radhë, përballemi me faktin sa shumë e parapëlqejmë ritmin tonë kundrejt ritmit të paparashikueshëm që na përcaktohet nga rrethanat e jashtme.

Fatmirësisht, Fryma na jep frytin e durimit, që mund ta rikalibrojë sensin tonë të kohës. Durimi ose “vetëpërmbajtja”, siç edhe përkthehet ndonjëherë, na lejon që jo vetëm ta tolerojmë një ritëm që nuk e përcaktojmë vetë – jo vetëm të na duket i durueshëm – por edhe të gjejmë kënaqësi të vërtetë në të. Durimi na përshtat me një ritëm që na lejon të përkujdesemi për nevojat e të tjerëve në vend që të ndjekim agjendën tonë.

Një përkthim i vjetër i durimit në këtë varg është “qëndresë”. Durimi na mëson të durojmë gjëra që në rrethana të tjera do të na sprovonin në limite. Gjithmonë do të ketë gjëra (dhe njerëz) që “na e sprovojnë durimin”, por durimi që Perëndia kultivon në ne na lejon të bëjmë durim në mënyra që nuk i mendonim të mundura. Natyra “e qëndresës” e vetë Perëndisë na jep një model për ta imituar. Nëse ekziston një njeri në jetën tuaj, durimi i të cilit po sprovohet tani, mendojeni se si dhuntia juaj e durimit mund ta ndihmojë në lehtësimin e asaj barre. – Jessica Bratt Carle

Ndërsa luteni, kërkojini Perëndisë ta përcaktojë ritmin tuaj sipas kohës së Perëndisë!

#fjalëteshpresës #meditime #biblestudy #dita67