E fuqishme dhe efektive

Dita 87 — Lexoni nga: Jakobi 5:13-18

“…shumë fuqi ka lutja e të drejtit kur bëhet me gjithë shpirt.” (v. 16)

Njerëzit sot tërhiqen nga çdo gjë që është efikase dhe efektive. Shpikjet e reja kanë për synim ta bëjnë një detyrë ose mjet më të lehtë, më të shpejtë, më të fuqishme dhe efektive. A mund të jenë lutjet tona më të fuqishme dhe efektive? Bibla na thotë që po! Lutja efektive e largon përqendrimin nga njeriu dhe e drejton thirrjen te Perëndia që dëgjon dhe përgjigjet. Lutja e fuqishme ka më shumë të bëjë me kë po lutemi, sesa për çfarë po lutemi.

Në pasazhin e sotëm, apostulli Jakob pak a shumë na inkurajon që të lutemi. Pa ndonjë formulë, thjesht duhet të lutemi në situatat ku ndodhemi. Ne lutemi si njerëz të zakonshëm që po adhurojnë një Perëndi të jashtëzakonshëm! Jakobi thotë se njerëzit sot janë si Elia, një njeri tjetër si ne me gjithçka njerëzore. Lutja është efektive, jo për shkak të “gjigantëve shpirtërorë” që luten me fjalë aq të bukura, por për shkak të Perëndisë së jashtëzakonshëm i cili, në Krishtin, me hir i dëgjon njerëzit e Tij. Përbërësi kryesor është Perëndia. Duke u përqendruar te fakti se sa i fuqishëm dhe efektiv është Perëndia, na bën që të bëjmë lutje më të fuqishme dhe efektive.

E kuptoni dhuratën e mrekullueshme që kemi te vetë lutja? Ne mund të flasim drejtpërdrejt me Krijuesin në çdo kohë dhe kudo. Jakobi na thotë që të lutemi kur jemi në telashe, të lumtur, të sëmurë, në nevojë dhe kur kemi mëkatuar. Lutuni edhe kur thjesht keni nevojë për të folur. Ati juaj qiellor ju do dhe do që të dëgjojë nga ju. A do të luteni tani? — Tim Huizenga

Ndërsa luteni, kërkojini Perëndisë t’ju ndihmojë të përqendroheni tek Ai dhe se sa i fuqishëm dhe efikas është Ai.