Emanuel

Meditime 2 Dhjetor (Lexoni nga Mateu 1:18-25)

Ja, e virgjëra do të mbetet me barrë dhe do të lindë një fëmijë të cilin do ta quajë Emanuel. (Isaia 7:14)

Disa gjëra ndodhin gjithmonë njëlloj. Dielli lind në mëngjes dhe perëndon në mbrëmje. Pranvera i lë vendin verës, e cila më pas i lë vendin vjeshtës. Një foshnjë rritet që të bëhet burrë ose grua; një burrë dhe një grua sjellin në jetë një foshnjë. Kështu funksionon bota.

Përveç një rasti të vetëm. Një herë në historinë e botës, një foshnjë u ngjiz në një mënyrë krejt të papritur. Përpara se të fillonte të rrinte me të fejuarin e saj, një vajzë e re, e quajtur Maria, “mbeti shtatzënë nga Fryma e Shenjtë” (Mateu 1:18). Edhe pse Isaia e kishte profetizuar qindra vjet më parë që një e virgjër do të mbetet me barrë, Jozefi përsëri u befasua. Derisa një engjëll iu shfaq në ëndërr, Jozefi s’mund ta kuptonte që profecia e lashtë po përmbushej nga e fejuara e tij. Si mund të priste dikush që fjalët e Isaias të përmbusheshin në atë mënyrë aq të mrekullueshme dhe fare të papritur? Por profecia e Isaias përmbante disa emra për Perëndinë – Emanuel, “Perëndia me ne” (v. 23) dhe kur Perëndia afrohet, ndodhin gjëra të papritura. “Perëndia me ne” së pari nënkuptonte që Perëndia ishte me Marian. Madje, po rritej në barkun e Marias. Ç’surprizë me të vërtetë e papritur!

Si ju ka befasuar Perëndia së fundmi? Si po dëshironi ju që Perëndia t’ju afrohet? Si keni parë ju prova që Jezusi është i pranishëm, edhe tani, brenda jush? Këtë sezon Adventi, prisni ta shikoni Perëndinë t’ju shfaqet në mënyra të papritura. – Sarah Sanderson

Ndërsa luteni, kërkojini Perëndisë t’ju befasojë me afërsinë e Tij.

#Krishtlindje #Christmas #fjalëteshpresës #meditime #app #ios #android