Gjykatësi që e dënoi Atë

Dita 16 | Lexoni nga Gjoni 18:28-19:16

Atëherë ai ua dorëzoi që të kryqëzohej. (v. 16)

Kredoja e Apostujve përmend tre emra mes 100 e ca fjalëve që përmban. I pari, sigurisht, është Jezusi, e dyta është Maria, i treti është Ponc Pilati. Pilati do të ishte harruar plotësisht, një zyrtar i parëndësishëm i një perandorie të vdekur prej kohësh, po të mos ishte një gjyq që ai drejtoi. Por ai ishte gjyqi në të cilin Pilati dënoi Jezusin me vdekje dhe tani emri i tij jeton në çnderim përjetë. Si do t’ju dukej të kujtoheshit përjetësisht si njeriu që kryqëzoi Krishtin? U desh vetëm një vendim prej burracaku nga ana e Pilatit.

Pilati nuk donte ta dënonte Jezusin. Secili prej shkruesve të ungjijve e kujton me dhimbje vendimin e Pilatit. Jezusi nuk ishte fajtor (Gjo. 18:38). Por si shumë njerëz të suksesshëm, Pilati ishte i dashuruar me këtë botë, me statusin e tij, pronat që kishte dhe sidomos me karrierën. Përballë të gjitha këtyre ishte fati i këtij njeriu të pafajshëm, Jezus Krishtit.

Ekuilibri u përmbys në çastin vendimtar kur dikush nga turma bërtiti se nëse Pilati e lironte Jezusin, ai nuk do të ishte më mik i Cezarit. Nuk do të ishte mirë për të që ndonjë raport negativ nga Judea t’i shkonte në vesh perandorit. Prandaj, zgjedhjet e Pilatit ishin këto; ai ose do të ishte mik i Jezusit, ose i Cezarit. Ai mund të kishte botën, ose të kishte Krishtin, por jo të dy.

Edhe pse Pilati mund të kishte dashur të zgjidhte Jezusin, ai nuk ishte i gatshëm të paguante koston e kësaj.

Po ju? Kë do të zgjidhni sot, botën apo Jezusin? — David Bast

Ndërsa luteni, kërkojini Perëndisë t’ju bëjë që ta zgjidhni Atë sot.

#fjalëteshpresës #meditime #biblestudy #dita16