I disiplinuar për lutje

Dita 90 — Lexoni nga: 1 Pjetri 4:7-11

“Tashmë fundi i të gjithave u afrua; jini, pra, të përkorë dhe rrini zgjuar për t’iu kushtuar lutjeve.” (v. 7)

Një i krishterë i zakonshëm lutet rreth një minutë në ditë, kurse një pastor i zakonshëm lutet rreth pesë deri në dhjetë minuta në ditë. Sado që të jetë koha që kalojmë në lutje, çfarë do të ndodhte nëse do të luteshim më shumë nga sa lutemi?

Sa herë që shihni njerëz të lutjes, shihni lëvizjen e Mbretërisë. Në Bibël, Danieli ishte përgatitur që të jepte jetën e tij në vend që të hiqte dorë nga të luturit tre herë në ditë. Dishepujt përfunduan në burg sepse predikonin dhe luteshin për shërim në emrin e Jezusit. Vetë Jezus Krishti u lut gjatë gjithë natës përpara se të vuante dhe të vdiste në kryq. Shikoni ndikimin e lutjes!

Sa kohë ka kaluar që kur keni patur një kohë kuptimplotë me Zotin? Pse nuk provoni diçka të re me lutjen, të bëheni të disiplinuar për këtë dhe të shihni çfarë do të bëjë Perëndia? Sa e vërtetë është shprehja: “Kur punojmë, punojmë ne, kur lutemi, punon Perëndia.” Ju sfidoj që të bëni lutje të fuqishme. Bëhuni kreativë. Bëni një shëtitje duke u lutur. Bëni vrap duke u lutur. Shkruajini lutjet tuaja për një muaj. Thërrisni disa miq për një orë lutje herët në mëngjes. Lutuni mbi secilin prej fëmijëve tuaj kur po flenë. Mblidhuni me miq të krishterë, vendosni një karrige në mes të dhomës dhe uluni aty secili prej jush ndërsa të tjerët luten për ju. Nëse fundi është afër, a nuk duhet që të lutemi? — Bob Bouwer

Ndërsa luteni, kërkojini Perëndisë që t’ju mbushë me dëshirën për t’u lutur përmes punës së Frymës së Shenjtë.