Identiteti: “Unë jam i yti”

Dita 16 — Lexoni nga: Isaia 43:1-7

“Mos ki frikë, sepse unë të kam çliruar, të kam thirrur me emër; ti më përket mua.“ (v. 1)

Një miku im më tha se kur ishte i vogël, çdo ditë ndërsa dilte nga shtëpia për në shkollë, babai i tij e kujtonte: “Mbaj mend se kush je!” Babai i mikut tim donte që i biri të dinte se pavarësisht se ku shkonte apo me çfarë përballej atë ditë, ai i përkiste familjes së tij dhe i përkiste Zotit.

Kur ne ndajmë dëshminë personale, historinë se si arritëm që t’i përkasim Perëndisë, ne jemi dëshmitarë të një të vërtete themelore: Unë jam fëmijë i dashur i Mbretit (v. 4). Ne e mbajmë mend se kush jemi. Shpallja e kësaj të vërtete mund çdo gënjeshtër të dëmshme të armikut, që ne nuk na do njeri, që jemi vetëm, që askush nuk është në anën tonë. Satani me dinakëri përdor çdo gjë të keqe dhe të tmerrshme që gjen, sëmundjet, aksidentet, abuzimin, varfërinë, braktisjen, që të përpiqet të vërtetojë gënjeshtrën e tij. Ilaçi për këtë gjendet në pasazhin e sotëm, një kujtesë se sa shumë e do Perëndia popullin e Tij. Ai na do shumë dhe na krijoi për lavdinë e Tij, të krijuar t’i përkasim ngushtësisht Atij (v. 7).

Kur armiku e tundoi Jezusin tre herë në shkretëtirë, çdo tundim ishte një sfidë e drejtpërdrejtë për identitetin e Jezusit (“Nëse je Biri i Perëndisë…” Luka 4:3-9). Zoti e filloi dhe e mbylli shërbesën e Tij tokësore me gjithë plotësinë e identitetit të Tij, si Biri i Perëndisë, që sakrifikoi jetën e Tij për identitetin tonë të ri si të dashurit e Tij. Kjo është historia më e bukur për të treguar! “Shikoni ç’dashuri të madhe na dha Ati, që të quhemi bij të Perëndisë” (1 Gjoni 3:1). — Linda Rogge-Rubingh

Ndërsa luteni, falënderoni Zotin që ju ka quajtur të Tijtë dhe ju ka dhënë një dëshmi!