Krenaria

Dita 33 | Lexoni nga Ezekieli 28:11-19

Ti ishe i përsosur në rrugët e tua qysh nga dita që u krijove, deri sa nuk u zbulua te ti çoroditja. (v. 15)

Kur jetojmë në bollëk, ndonjëherë bëhemi arrogantë dhe biem në mëkat. Kjo ishte historia e Tiros, një qytet-shtet i pasur. Ezekieli 28 hapet me pranimin e arritjeve të Tiros në zhvillimin e territorit të saj. “Ja, ti je më i urtë se Danieli, asnjë sekret nuk mbetet i fshehur për ty; me diturinë tënde dhe zgjuarësinë tënde ke grumbulluar pasuri dhe ke mbledhur ar dhe argjend në thesaret e tua; me diturinë tënde të madhe, me tregtinë tënde ke rritur pasuritë e tua” (v. 3-5). Fatkeqësisht, kjo njohje përfundon me deklaratën: “dhe zemra jote u bë krenare për shkak të pasurive të tua.”

Është pikërisht kjo krenari e Tiros të cilën Ezekieli dënon. Nuk është pasuria e Tiros ajo që vihet në diskutim, por mëkati i saj. “Nga shkaku i bollëkut të tregtisë sate, u mbushe me dhunë dhe mëkatove” (v. 16). “Në morinë e paudhësive të tua, me ligësinë e tregtisë sate ke përdhosur shenjtëroret e tua” (v. 18). Prandaj Perëndia e ndëshkoi Tiron.

Bollëku i pasurisë nuk do të thotë domosdoshmërisht bekimi i Perëndisë. Në fakt, mund të jetë shenja e parë e zemërimit të Perëndisë. Perëndia nuk është kundër pasurisë, por Perëndia kurrë nuk e pëlqen mëkatin, përfshirë mashtrimin për pasurim vetjak dhe krenarinë. Shumë njerëz janë vërtet të pasur, por nuk gëzojnë lumturi. Ndërsa ndiqni Perëndinë, mbani mend se ndjekja e rrugës së Perëndisë nuk është mjet për pasuri. Në vend të pasurisë ose suksesit, Jezusi premton jetë (Gjoni 10:10). — Paulus Sugeng Widjaja

Ndërsa luteni, kërkojini Perëndisë t’ju mbajë larg krenarisë dhe dëshirës për të pasuruar veten.