Kur Perëndia na ndjek

Dita 84 | Lexoni nga Psalm139

Ti më ke hetuar, o Zot, dhe më njeh.” (v. 1)

Ndonjëherë, kur qëndroj në qetësi para pasqyrës dhe përqendrohem te sytë e mi, mendoj: “A të njoh gjë ty?” Është një çast sinqeriteti, lehtësisht i shpërqendrueshëm nga furça e dhëmbëve apo makijazhi. Por Perëndia nuk ka shpërqendrime të tilla. Kërkojini Atij që t’ju hetojë vërtet dhe Ai nuk do të shpërqendrohet. Perëndia e njeh zemrën tonë, frikën tonë, mendimet tona, qëllimet tona, ëndrrat dhe zhgënjimet tona. Mesazhi i mahnitshëm i Psalmit 139 është se kur Perëndia na heton dhe na njeh, Ai na përgjigjet me një dashuri të mahnitshme.

Psalmi 139 na konfirmon se kur ne i afrohemi Perëndisë, edhe Ai do të na afrohet neve. Por edhe më shumë se kaq, ne nuk mund t’i shpëtojmë Perëndisë (v. 7-12). Mund të ndihemi sikur na ka shtypur bota, të rrahur, të goditur nga të tjerët. Mund të ndihemi të padenjë, apo të padobishëm, por dashuria e Perëndisë na kërkon dhe na ndjek, na ndihmon të ngrihemi nga errësira dhe na jep siguri me dashurinë e Tij të qëndrueshme. Perëndia na do me një dashuri të mahnitshme dhe të pakushtëzuar. Ai na do, sepse Ai na njihte që nga fillimi, Ai na krijoi (v. 13-14). Dhe gjërat që Ai bën janë të mrekullueshme. Ai e di që ne s’mund ta jetojmë dot jetën vetëm dhe kurrë nuk e ka dashur këtë.

Nuk ka rëndësi nëse mendojmë se kemi dështuar në të shkuarën, apo se çfarë po kalojmë tani, Perëndia po na ndjek me mirësinë dhe dashurinë e Tij. Ai është aty për të na ngushëlluar dhe që të ecë me ne në çdo hap që hedhim. — Ariana D. Den Bleyker

Ndërsa luteni, kërkojini Perëndisë t’ju tregojë si mund t’i afroheni Atij.

#Psalmi139 #PerëndiaNaNjeh #DashuriPaKusht #HetuarNgaZoti #AfrohuTeZoti #ZotiNaNdjek #NukJemiVetëm #KrijuarMeDashuri #FjalëteShpresës #Meditime