Lajmi i mirë

Dita 14 | Lexoni nga Luka 5:27-32

S’kam ardhur të thërras të drejtët, por mëkatarët në pendim. (v. 32)

Kjo thënie e Jezusit, tregon shumë për qëllimin e ardhjes së tij. Jezusi u akuzua prej elitës fetare të judenjve se rrinte me mëkatarët dhe të padrejtët. Interesante që edhe kishat kudo nëpër botë, akuzohen për të njëjtën gjë. Sa herë keni dëgjuar që në kishë hyjnë lloj-lloj njerëzish mëkatarë. Ose, “unë nuk vij në kishë sepse aty ka njerëz të ulët”.

Por, ashtu si Jezusi tregon qartë qëllimin e tij se nuk erdhi për të drejtët por për të padrejtët, ashtu edhe kishat lokale, ekzistojnë për të thirrur mëkatarët në pendim, dhe jo të drejtët. Prandaj, mos u çuditni që nëpër kisha do të gjeni njerëz nga shtresa të ndryshme. Edhe pse duket sikur në këtë thënie, ka mëkatarë dhe të drejtë, realisht ka vetëm një kategori njerëzish dhe këta janë mëkatarët. Jezusi u referohet kundërshtarëve të tij sipas mendimit të tyre, dhe jo faktit se ata ishin po aq mëkatarë sa të tjerët të cilët akuzoheshin prej tyre. A ju besohet se mëkatarët akuzojnë mëkatarë të tjerë se ata janë mëkatarë?

Në thelb, ka dy kategori njerëzish: mëkatarë që e dinë se janë mëkatarë dhe se kanë nevojë për falje, dhe, mëkatarë që refuzojnë se janë mëkatarë dhe që e shohin veten si të drejtë. Kështu që Jezusi ndonëse ka ardhur për të gjithë mëkatarët, ai e ofron veten ndaj grupit që ka nevojë për të. Një ditë, mik, mbase edhe ju do ta ndjeni pisllëkun e mëkatit tuaj. Atëherë kujtohuni se Jezusi erdhi për ju, që t’ju lajë e pastrojë dhe për t’ju bërë të drejtë.

Jezusi erdhi për mëkatarët dhe kisha e Krishtit është e hapur për t’u shërbyer mëkatarëve. Ky është lajmi i mirë i ungjillit në botë. – Gentian Dogani

Ndërsa luteni, pranoni që jeni mëkatar dhe falënderojeni Perëndinë që erdhi për mëkatarët.

#Luka5 #JezusiErdhiPerMekataret #LajmiIMire #Ungjilli #Pendimi #FaljeHyjnore #KishaPerMekataret #JezusiShpetimtari #JoTeDrejtePorMekatare #FjalëteShpresës #Meditime