Llojet e dyshimit

Dita 22 | Lexoni nga: Luka 24:36-49

“…vetë Jezusi u shfaq në mes tyre…por ata, të tmerruar dhe gjithë frikë…” (v. 36-37)

Dje pamë se si dyshimi mund të jetë rezultat i të paturit një mendje të dyzuar, por mund të jetë edhe për shkak të frikës dhe pasigurisë. Pra, çfarë lloj dyshimi kanë dishepujt pasi panë Jezusin e ringjallur? Llojet e dyshimit bëjnë ndryshimin.

Dyshimi faktik ekziston për shkak se njerëzve iu mungon informacioni për t’i dhënë besimit të tyre një themel të fortë. Pasazhi ynë na tregon këtë lloj dyshimi. Kur Jezusi iu shfaq dishepujve pas dyerve të mbyllura, ata ishin të tmerruar dhe gjithë frikë. Për të larguar dyshimin e tyre, Jezusi iu dha atyre më shumë informacion. “Shikoni duart e mia dhe këmbët e mia,… Më prekni…” (v.39) Ata dyshuan në fillim, sepse u mungonin faktet.

Një lloj dyshimi më i vështirë është dyshimi emocional. Ka të bëjë me mënyrën sesi ndihen njerëzit për besimin e krishterë. Mund të shndërrohet në ankth, depresion, apo ndonjë lloj traume. Te Luka 24:41, menjëherë pasi Jezusi u dha dishepujve të Tij më shumë fakte, ne ndeshemi me dyshimin emocional. Ata ende nuk mund ta besonin “për shkak të gëzimit dhe habitjes.” Jeta e tyre ishte kthyer përmbys nga vdekja e Tij. Prandaj, tani, që e kanë para syve Faktin e Gjallë, nuk mund të kapërcenin dot përtej reagimit të tyre emocional.

Shumë prej nesh e kuptojnë shumë mirë këtë. Ne i dimë faktet, por shpresa dhe ëndrrat tona janë shkatërruar nga vuajtjet. Prandaj, lind dyshimi. Siç na i tregon pasazhi i sotëm nga Bibla, ky lloj dyshimi kërkon një shërbesë këmbëngulëse nga Jezusi. — Stan Mast

Ndërsa luteni, kërkojini Jezusit t’ju inkurajojë dhe ngushëllojë kur keni një mendje të dyzuar.

#fjalëteshpresës #meditime #biblestudy #dita22