Lum ai që lexon, lum ata që dëgjojnë

Dita 22 | Lexoni nga Zbulesa 1:1-3

Lum ai që lexon dhe lum ata që dëgjojnë fjalët e kësaj profecie dhe që ruajnë ato që janë shkruar në të. (v. 3)

Jezusi jo vetëm që u ringjall prej së vdekurish, por Ai është i ringjallur. Ai është i gjallë tani dhe ende u flet dishepujve të Tij. Dy kapitujt e parë të librit të Zbulesës përshkruajnë Zotin Jezus të ringjalluar dhe regjistrojnë mesazhin e vazhdueshëm të Tij për kishën. Jezusi dërgoi një engjëll për t’ia dhënë këtë mesazh Gjonit, në mënyrë që ta dimë edhe të gjithë ne, “shërbëtorët e Tij” (v. 1).

Mendoni pak për Gjonin ndërsa shfaqet në fund të Dhiatës së Re. Në atë kohë ai ishte shumë plak. Të gjithë apostujt e tjerë kishin vdekur, ishin martirizuar për hir të Ungjillit. Trupin Gjoni e kishte të lodhur, shikimin të zbehur, dëgjimin të venitur. Por shpirtërisht shqisat e tij ishin më të mprehta se kurrë më parë. Simboli i Gjonit në Kishë është ai i një shqiponje largpamëse. Shikimi i tij shpirtëror depërtoi në qiellin më të lartë, vizioni i tij u zgjat deri në fund të kohëve. Megjithatë, mos e shihni atë si një lloj parashikuesi. Atë mendojeni si një gazetar. Gjoni e quajti veten “martir” në kuptimin e parë të fjalës greke, një dëshmitar. Gjoni nuk po i shpikte këto gjëra. Ato që engjëlli i tregoi ai thjesht i shkroi në një libër që mund të lexohet, të dëgjohet dhe të zbatohet.

Kjo ngre një pyetje. Çfarë mendoni për Biblën? A është ajo thjesht një produkt i një imagjinate fetare, apo është një zbulesë nga Perëndia, që na është dhënë përmes dëshmitarëve njerëzorë? Lum ata që i lexojnë, që i dëgjojnë dhe i ruajnë fjalët e kësaj profecie, sepse koha është afër. — David Bast

Ndërsa luteni, përlëvdojeni Perëndinë për Fjalën e Tij.

#fjalëteshpresës#meditime#biblestudy#dita22