Mesia i panjohur

Dita 6 | Lexoni nga Veprat e Apostujve 8:26-39

Për kë e thotë profeti këtë? (v. 34)

Isaia thotë se kur Mesia të vinte në këtë botë, nuk do të “përputhej me profilin”. Ai nuk do të qëndronte mbi turmën, ashtu si mbreti Saul. Ai nuk do të ndiqte romakët dhe të themelonte mbretërinë e Izraelit të Madh. Mendimi më i përhapur te njerëzit ishte se Mesia që përshkruan Isaia nuk do të ishte në lartësinë e duhur.

A ju shkon mendja te dikush që përputhet me profilin e Isaias? Dikush i cilësuar si i padëshirueshëm, që erdhi pa shumë zhurmë? Mendoni pak për Jezusin e Nazaretit. I lindur i varfër, një njeri i shtresës punëtore, pak i njohur, që vdiq si një predikues shëtitës që nuk kishte as një shtrat të vetin.

Për shkak se Jezusi nuk dukej apo bëri atë që supozohej të bënte Mesia, shumica e njerëzve nuk e pranuan kur Ai erdhi. “Ai erdhi në shtëpinë e vet dhe të vetët nuk e pranuan…” (Gjo. 1:11). Është e vërtetë se ishin të paktë ata që, me anë të hirit të Perëndisë, e njohën dhe e pranuan Atë. Por përgjithësisht ata ishin njerëz që në kohën e tyre konsideroheshin si të parëndësishëm, siç ishin peshkatarët dhe gratë. Gjithashtu është e vërtetë që turmat e ndoqën Atë për njëfarë kohe, të mahnitur nga mrekullitë e Tij. Por kur Ai filloi të thoshte gjëra që atyre nuk u pëlqenin, turmat u zhdukën. (Shih Gjo. 6:66).

Edhe sot mes nesh Jezusi vazhdon të mos pranohet. Ju kujtohet se çfarë tha ai për të ushqyer të uriturit dhe për të vizituar të sëmurët dhe të burgosurit? “sa herë ia keni bërë këtë ndonjërit prej këtyre vëllezërve të mi më të vegjël, këtë ma bëtë mua.” (Mt. 25:40). Vras mendjen se kushedi sa herë e kam parë Jezusin dhe nuk e kam njohur. — David Bast

Ndërsa luteni, kërkojini Perëndisë që t’ju afrojë pranë Vetes.

#fjalëteshpresës#meditime#biblestudy#dita6