Një grykës dhe mik i mëkatarëve

Dita 31 | Lexoni nga Luka 7:24-35

“Erdhi Biri i njeriut që ha dhe pi, dhe ju thoni: “Ja grykësi dhe pijaneci, miku i tagrambledhësve dhe i mëkatarëve”. (v. 34)

Ishte gjëja më e keqe që mund të thoshin për Të. Farisenjtë, të kërcënuar nga shërbesat e Gjon Pagëzorit dhe Jezusit, kërkonin që të gjenin gabime te çdo gjë që bënin ata. Ata vendosën se Gjoni kishte “një demon” (v. 33). Po Jezusi? Gjëja më e keqe që mund të thoshin ishte se Ai ishte i mirëpritur dhe i dashur nga njerëzit mëkatarë, “grykësi dhe pijaneci, miku i tagrambledhësve dhe i mëkatarëve”. (v. 34)

Jezusi e dinte se çfarë mendonin ata, por në vend që ta mohonte, Ai e konfirmoi se “Biri i Njeriut që ha dhe pi…” (v. 34). Ndarja e ushqimit me të tjerët është një akt shumë njerëzor, jo vetëm për të plotësuar nevojat fizike për ushqim dhe pije, por edhe për të plotësuar nevojën për miqësi, bashkëveprim shoqëror dhe biseda. Ata që hëngrën darkë me Jezusin përjetuan mënyrat se si Shpëtimtari e identifikoi Veten me mëkatarët në natyrën e tyre njerëzore. Ai i kuptoi dobësitë dhe nevojat e tyre. Disa nga bashkëveprimet e Tij më me dhembshuri me të tjerët ndodhën duke ndarë ushqim. Kishte gjithashtu raste kur Ai i qortoi ata që kishin vetëdrejtësi dhe u tregoi nevojën e tyre për një Shpëtimtar. Kishte edhe “miqësi tavoline” të këndshme me miqtë e Tij, ndërsa Jezusi i përgatiste ata për të ardhmen, kur ditëve të Tij në tokë t’i vinte fundi.

Gjatë dy javëve në vazhdim, merrni një karrike dhe uluni në tavolinë. Është koha për të ngrënë darkë me Jezusin! — Laura N. Sweet

Ndërsa luteni, kërkojini Perëndisë uri për të kaluar kohë me Jezusin.

#fjalëteshpresës #meditime #biblestudy #dita31