Pashka e Re

Dita 90 | Lexoni nga Eksodi 12:21-28

Moisiu, pra, thirri gjithë pleqtë e Izraelit dhe u tha atyre: “Shkoni dhe merrni qengja për ju …, dhe flijoni Pashkët.” (v.21)

Që në fillim, kisha e hershme e lidhi kryqëzimin e Jezusit me historinë e Dhjatës së Vjetër të eksodit. Kur izraelitët ishin të shtypur nga sunduesit egjiptas, Perëndia veproi përmes Moisiut për të çliruar popullin e tij nga robëria dhe për t’i udhëhequr drejt lirisë. Perëndia dërgoi dhjetë plagë për ta bindur Faraonin ta lironte popullin e tij, plaga e fundit ishte më shkatërrimtarja. Perëndia do të godiste të gjithë të parëlindurit, fëmijë dhe kafshë. Por Perëndia i udhëzoi izraelitët të flijonin një qengj dhe të lyenin arkitrarët dhe dy shtalkat e derës me gjakun e tij. Perëndia do t’i kalonte mbi shtëpitë e tyre.

Për të krishterët e parë, vdekja e Jezusit në kryq ishte Pashka e re, dhe ringjallja e tij ishte eksodi i ri. 1 e Korintasve 5:7-8 shpall: “Pashka jonë, që është Krishti, u flijua për ne. Prandaj le të kremtojmë festën jo me maja të vjetër, as me maja ligësie dhe keqësie, por me bukë pa maja të sinqeritetit dhe të së vërtetës.”

Në këtë kontekst, fokusi i gjakut të Krishtit të derdhur në kryq nuk është si ofertë për të shlyer mëkatin (edhe pse sigurisht është edhe kjo), por si plan i Perëndisë për të shpëtuar popullin e tij nga vdekja dhe për t’i çliruar nga robëria. Lutja e eukaristisë në liturgjinë episkopale e portretizon mirë: “Ai na ka nxjerrë nga robëria në liri, nga mëkati në drejtësi, nga vdekja në jetë.” Faleminderit Perëndisë, çliruesit tonë të vërtetë! — Brian Keepers

Ndërsa luteni, falënderojeni Perëndinë për gjakun e Krishtit që ju shpëton nga vdekja dhe ju çliron në Frymë.