Pavarësisht madhësisë

Dita 55 | Lexoni nga Romakëve 9:25-29; Eksodi 2:1-10

Edhe sikur të ishte numri i bijve të Izraelit si rëra e detit, vetëm mbetja e tij do të shpëtohet. (Rom. 9:27)

Një predikues i famshëm i ungjillit e përshkroi, me humor, rritjen e bashkësisë së tij. “Unë erdha dhe predikova realitetin e besimit, që njeriu është një hiç. Disa u larguan. Vazhdova përsëri me predikimin tim. Më shumë u larguan. Derisa mbetën vetëm disa, dhe atëherë kisha filloi të rritej”.

Pali tani, me një ton më serioz, tregoi një histori të ngjashme e cila është e rrënjosur tek fjala “mbetje” nga Dhjata e Vjetër. Profetët e Dhjatës së Vjetër në veçanti e përdornin këtë shëmbëlltyrë shpirtërore. Pali vazhdon shqyrtimin që ai i bën historisë së Izraelit duke shfrytëzuar paralajmërimet e profetëve për gjykimin që do të vinte. Në vargun kyç për sot, Pali shpjegon se Izraeli ishte një popull i shumtë, mirëpo shumë humbën në mërgim. Ndjekësit judenj të Jezusit në kishat shtëpi në Romë ishin kthyer në minorancë në numër dhe madhësi në krahasim me kishat shtëpi të johebrenjve. Masa në të cilën pranohej ungjilli nga johebrenjtë prodhonte një krizë shpirtërore për besimtarët judenj: “A mos nuk ka qenë Perëndia besnik me Izraelin?”. Jo, Perëndia kishte qenë duke i predikuar Izraelit derisa ngeli një mbetje, në mënyrë që johebrenjtë të vinin në besim dhe kombet të mund të shpëtoheshin. Ky ka qenë modeli i Perëndisë në historinë e shpëtimit.

Mua më vjen ndërmend Moisiu i vogël, i cili u vendos në një kanistër prej xunkthi dhe u lëshua në lumin Nil (Eks. 2:1-10). Ndonjëherë premtimet e Perëndisë varen vetëm nga një xunkth i vogël. Perëndia mund ta ndërtojë mbretërinë, pavarësisht nga madhësia e bashkësisë sonë. — Kent Fry

Ndërsa luteni, i kërkoni Perëndisë ta përdorë komunitetin tuaj të besimit, pavarësisht madhësisë.