Pendohuni dhe besoni

Dita 30 | Lexoni nga: Marku 1:14-20

“…mbretëria e Perëndisë është afër. Pendohuni dhe besoni ungjillin.” (v. 15)

Për dyshimin e vullnetshëm, dyshimin e bazuar mbi refuzimin kokëfortë për t’iu dorëzuar vullnetit të Perëndisë për jetën tonë, mjeti me të cilin Jezusi e mund mosbesimin tonë është një thirrje e fortë për t’u penduar dhe për të besuar. Fakte të tjera nuk na ndihmojnë për këtë lloj dyshimi, sepse problemi nuk është informacioni. Problemi është zgjedhja.

Kam një mik të vjetër që zbavitet me dyshimin e tij. Ai është një besimtar i kalitur, gjithë jetën anëtar i kishës, por ai ka zgjedhur të dyshojë sepse i pëlqen ndjesia e çlirimit, e ecjes në anën e panjohur, i të qenit ndryshe. Ai nuk ka nevojë për më shumë informacione. Ai ka nevojë të zgjedhë që besimi i thjeshtë te Jezusi, si i një fëmije, është më i mirë se dyshimi që ai ushqen. Ai duhet të pendohet që ka zgjedhur dyshimin.

Miku im nuk do të binte dakord, por problemi me të është refuzimi për të besuar mesazhin që predikoi gjithmonë Jezusi. “Mbretëria e Perëndisë është afër.” Jezusi donte të thoshte se Mbretëria është afër në Veten e Tij. “Unë jam Mbreti i të gjitha gjërave, përfshirë dhe jetën tuaj.” Nëse miku im do të thërriste: “Jezus, unë besoj, më ndihmo në mosbesimin tim!”, jam i sigurt që Jezusi do të përgjigjej kështu: “Do të më pëlqente. Tani, pendohu dhe më bëj Mua Zot të mendjes dhe vullnetit tënd. Përulu përpara Meje.”

Bëjeni tani! “U mbush koha!” Pendohuni dhe besoni lajmin e mirë që Jezusi është Mbret. — Stan Mast

Ndërsa luteni, përdorni fjalët e këngës: “U bëftë vullneti Yt, Zot! U bëftë vullneti Yt! Ti je poçari, e unë argjila. Më jep formë dhe më bëj sipas vullnetit Tënd, ndërsa pres, dorëzohem dhe qëndroj në vend”. (U bëftë vullneti Yt)

#fjalëteshpresës #meditime #biblestudy #dita30