Perëndi i fuqishëm

Meditime 5 Dhjetor (Lexoni nga Marku 4:35-41)

Do të quhet … Perëndi i fuqishëm. (Isaia 9:6)

Nëse e keni mbajtur ndonjëherë një foshnjë të sapolindur në krahë, e dini që ka shumë fjalë për ta përshkruar atë bukurosh: I vogël. I brishtë. I çmuar. Kur e mbajta për herë të parë vajzën time të madhe, e cila lindi tetë javë para kohe, fjalët që më erdhën krejt papritur, ishin: “Ajo është e lehtë si një pupël.” Jezusi nuk lindi para kohe, por Ai ishte aq i vogël dhe aq i brishtë sa çdo foshnjë tjetër e sapolindur. Ç’paradoks që Ai, edhe në grazhd, ishte Perëndi i fuqishëm.

Ndoshta vizioni më i qartë i Jezusit në ungjij si Perëndi i fuqishëm vjen nga fashitja e stuhisë. “Ndërkaq shpërtheu një furtunë e madhe” dhe valët e mbushën varkën me ujë (Marku 4:37) dhe dishepujt kishin frikë se mos mbyteshin (v. 38). Megjithatë, Jezusi tha vetëm një fjalë dhe gjithçka u fashit. Dishepujt i zuri një frikë e madhe: “Vallë, kush është ky, që po i binden edhe era edhe deti?” (v. 41). Por edhe në këtë histori, shohim edhe prova të faktit që Jezusi ishte njeri. Ndërsa shpërtheu furtuna, Jezusi po flinte. Trupi i Tij njerëzor kishte nevojë për çlodhje, edhe ndërkohë që natyra e Tij hyjnore sundonte mbi gjithë krijimin.

Ndërsa përgatitemi ta mirëpresim Jezusin për Krishtlindje, të mos e harrojmë që ajo foshnja e vogël është edhe Perëndi i fuqishëm. Kur tundohemi që të ndihemi të largët prej Tij, mund të kujtojmë që Ai e di që ne jemi njerëz. Kur druajmë që rrethanat do të na gjunjëzojnë, mund t’i thërrasim Atij që të fashitë çdo stuhi. Ai u bë njëri prej nesh, megjithatë, sundon mbi çdo gjë. – Sarah Sanderson

Ndërsa luteni, kërkojini Perëndisë të fashitë stuhitë në jetën tuaj!

#Krishtlindje #Christmas #fjalëteshpresës #meditime #app #ios #android