Perëndisë i besojmë

Dita 82 | Lexoni nga Psalmi 56

“Kur të kem frikë, do të mbështetem te ti. Me ndihmën e Perëndisë do të kremtoj fjalën e tij; kam vënë besimin tim te Perëndia, nuk do të kem frikë. (v. 3-4)

Kur fillova të udhëtoja për punë, m’u desh të fluturoja me avion. Në fillim kisha frikë nga fluturimi, por sa më shumë që fluturoja, aq më pak frikë kisha. Besojini Perëndisë. Është e lehtë ta thuash, por e vështirë ta bësh. Gjërat janë më të vështira kur ne përqendrohemi te frika dhe i heqim sytë nga Perëndia. Në Shkrim na jepet një ftesë për t’i besuar, për të qenë pranë dhe të vetëdijshëm për praninë e Perëndisë (Rom. 8:28).

Ashtu si ne, edhe Davidi përjetoi frikë, ankth, pikëllim dhe dhimbje. Ai e shkroi Psalmin 56 ndërsa frikësohej për jetën e tij dhe në të ndan sekretin për të kapërcyer rrezikun dhe vështirësitë. “Kur të kem frikë, do të mbështetem te Ti.” (v. 3). Për ta thënë thjesht, kur ne mbështetemi te Perëndia, frika i lë vendin besimit. Këndvështrimi ynë ndryshon teksa ndalojmë së menduari se sa të mëdha janë problemet tona dhe fillojmë të shohim sa i madh është Perëndia. Davidi ndihej i vetmuar, i dëshpëruar dhe i frikësuar, derisa me qëllim ai e drejtoi vëmendjen te Perëndia. Ashtu si Davidi, edhe ne do të zbulojmë se besimi ynë rritet teksa kujtojmë se Perëndia është pranë nesh, kur kremtojmë mirësinë e Tij dhe kujtojmë premtimet e Tij (v. 3-4; 9-11).

Nëse e vendosim besimin gjithmonë te Perëndia, në kohë të mira dhe të këqija, ne do të fillojmë të shohim se si duke i besuar Perëndië ne zbulojmë guximin dhe çlirimin, edhe kur jemi të frikësuar. Për rrjedhojë, duke i besuar Perëndisë ne fitojmë siguri në aftësitë e Tij për të ndërhyrë, për të na dhënë shpresë dhe për të sjellë ndryshime pozitive në jetën tonë. — Ariana D. Den Bleyker

Ndërsa luteni, kërkojini Perëndisë se si mund të vendosni besimin e plotë tek Ai.

#Psalmi56 #Besim #MosKiFrikë #PerëndiaMeNe #KremtoFjalen #ForcaNeBesim #Shpresë #FjalëteShpresës #Meditime