Qyteti i vogël i Betlehemit

Dita 85 — Lexoni nga: Mikea 5:1-9

“Dhe ai vetë do të jetë paqja.” (v. 5)

Profecia e Mikeas u bë në epokën e perandorive. Mikea ishte një profet në vitin 700 para Krishtit, një kohë kur asirianët pushtuan Izraelin dhe zaptuan Judën. Populli i Perëndisë për shekuj e kishte marrë si të mirëqenë mbrojtjen e mbinatyrshme të tij. Papritur u ndjenë të cënueshëm (v. 1). Tragjikisht, ata u përgjigjën duke kërkuar aleanca me fuqi politike pagane, në vend që t’i besonin Perëndisë. Përmes Mikeas, Perëndia i thotë popullit të Tij se shpëtimi i tyre nuk do të vinte nga Asiria, Babilonia, Egjipti, apo ndonjë superfuqi tjetër botërore. Ai do të vinte nga… qyteti i vogël i Betlehemit.

Përballë trazirave politike globale, pasigurisë ekonomike dhe rrëmujave ekologjike, është e lehtë të ndihesh i cënueshëm. Problemet e botës janë shumë të mëdha dhe ne shumë të vegjël. Është e natyrshme që të kthehesh te dikush apo diçka e madhe dhe e fuqishme për t’i besuar, këtij presidenti, atij drejtuesi, apo asaj perandorie. Problemi është se paqja e tyre vjen gjithmonë me koston e dikujt tjetër. Perëndia ofron diçka ndryshe, ripërtëritje dhe paqe të vërtetë, “shalom”, për të gjitha kombet (v. 7-9).
Paqja e Perëndisë e premtuar përmes Mikeas nuk erdhi nga një superfuqi botërore, por erdhi nga një Shpëtimtar (v. 2-5). Ky shpëtimtar do të lindte jo në kryeqytet, por në qytetin e vogël të Betlehemit. Shtëpia e Tij e parë nuk do të ishte një pallat, por një stallë. Kurora që do të vinte nuk ishte me ar, por me gjemba. Ai do ta fitonte botën duke dhënë jetën e Tij. Ai na drejton në udhën e Tij të paqes, duke marrë kryqin tonë dhe duke e ndjekur Atë. — Ben Van Arragon

Ndërsa luteni, kërkoni për paqen në vendin e duhur: Shpëtimtari që dha jetën për ju.