Shkalla drejt qiellit

Dita 78 | Lexoni nga Zanafilla 28:10-22

Kjo është porta e qiellit. (v. 17)

A e keni të vështirë ta shikoni dorën e Perëndisë duke vepruar në periudha të errëta dhe të vështira? Unë po. Kur jeta bëhet e vështirë, vizioni im tkurret dhe nuk e shikoj dot qëllimin më të madh të Perëndisë dhe planifikoj të fiksohem vetëm te problemet dhe shqetësimi im. Megjithatë, pikërisht në këto vende Perëndia ka më shumë dëshirë të na e shfaqë praninë e Tij. Në historinë e ëndrrës së Jakobit, shikojmë që prania e lavdishme e Perëndisë është pikërisht këtu, shpesh në situatat që e presim më pak.

Ndërsa po ia mbathte i frikësuar nga zemërimi i vëllait të tij, Esaut, Jakobi ndalon që të pushojë natën. Ai sheh në ëndërr një shkallë që lidh tokën me qiellin dhe engjëjt që ngjiten dhe zbresin prej saj. Në këtë vegim, Perëndia bën një besëlidhje të pranisë së Tij besnike me Jakobin që vezullon si yjet në errësirën e natës. Kjo nuk është aspak rastësi, por është vazhdim i premtimeve që Ai i bëri gjyshit të Jakobit, Abrahamit. Pasi i doli gjumi, Jakobi tha: “Me siguri Zoti është në këtë vend dhe unë nuk e dija” (Zan. 28:16).

Në stinët tona më të errëta, sa shpesh humbasim shfaqje të qiellit mbi tokë vetëm se nuk presim që ato të jenë të pranishme në dhimbjen tonë? Ëndrra e Jakobit për shkallën që lidhte qiellin e tokën shërben që të na kujtojë se po ndodhin shumë më tepër gjëra nga sa shikojmë ne. Në errësirë, Perëndia është afër. Dhe, ashtu si Jakobi, kur e kuptojmë këtë, mund të kalojmë në një qëndrim adhurimi ndërsa presim ditën kur toka dhe qielli do të bëhen një. – Katelyn J. Dixon

Ndërsa luteni, kërkojini Perëndisë ta shfaqë praninë e Tij në vende të papritura sot – edhe atje ku ndodheni!

#fjalëteshpresës #meditime #biblestudy #dita78