Shkëmbimi më i këndshëm

Dita 3 | Lexoni nga Galatasve 3:6-14

Krishti na shpengoi nga mallkimi i ligjit, sepse u bë mallkim për ne. (v. 13)

Dje pamë se si Jezusi, Adami i ri, rishkruan historinë tonë. Në leximin e sotëm nga Bibla, Pali shkon më tej, duke thënë se gjithashtu Jezusi zë vendin tonë. Ai bëhet zëvendësuesi ynë me dëshirë, ndërkohë që ne gjendemi nën “mallkimin” e mëkatit dhe vdekjes.

Fjala kyçe në greqisht që Pali përdor këtu është “hiper” që është përkthyer me fjalën “për”. Më herët tek libri i Galatasve, Pali shkroi, “Zoti ynë Jezu Krisht, që e dha veten e tij për [hiper] mëkatet tona”. Përsëri më tej, tek 2:20: “Birit të Perëndisë, që më deshi dhe dha veten për [hiper] mua”. Dhe e shohim edhe një herë në vargun kyç për sot, “Krishti na shpengoi … sepse u bë mallkim për [hiper] ne” (3:13).

Pali e bën shumë të qartë këtu dhe në vende të tjera se prirja parësore e Perëndisë karshi nesh (dhe karshi gjithë krijimit) është që ai është për ne! Kryqi nuk e ndryshon qëndrimin e Perëndisë kundrejt nesh; ai e zbulon atë. Sepse pikërisht për shkak se Perëndia është për ne, ai është kundër mëkatit, vdekjes dhe fuqive të së keqes. Prandaj, kryqi nuk do të thotë që Ati po vepron kundër Birit, por do të thotë se të tre personat e trinisë po bashkëveprojnë së bashku për shpëtimin tonë.

Më pëlqejnë shumë këto fjalë nga vepra e shekullit të dytë me titull “Letra drejtuar Diognetit”: “Oh, ç’shkëmbim i këndshëm! … Qenësia mëkatare e të shumtëve është e fshehur tek i Drejti, ndërkohë që qenësia me drejtësi i Njërit shfajëson të shumtët që janë mëkatarë … Biri i Perëndisë e ka dhënë veten e tij për të qenë atje ku ishim ne, në mënyrë që ne të mund të jemi atje ku është ai, pra, pjesëmarrës në jetën e Perëndisë”. — Brian Keepers

Ndërsa luteni, lavdëroni Perëndinë trini që e ka shkëmbyer mallkimin e mëkatit tuaj me faljen dhe jetën e re tek Jezusi.