Skandali i Kryqit

Dita 88 | Lexoni nga 1 e Korintasve 1:26-31

Perëndia ka zgjedhur gjërat e marra të botës për të turpëruar të urtët; dhe Perëndia ka zgjedhur gjërat e dobëta të botës për të turpëruar të fortët. (v.27)

Dje shqyrtuan se si kryqi u hodh poshtë si “marrëzi” për grekët. Por nuk ishte vetëm bota greko-romake ajo që e pa kryqin si absurd. Ishte edhe komuniteti hebre, populli i besëlidhjes së Perëndisë. Pali shkroi se kryqëzimi i Krishtit ishte “skandal për hebrenjtë” (v. 23). Fjala greke që përdor Pali këtu është skandalon — skandal!

Pse? Sepse Ligji i Përtërirë 21:23 e thotë qartë se kushdo që varet në një pemë është i mallkuar nga Perëndia. Kjo shpjegon pse aq shumë në komunitetin hebre e refuzuan Jezusin si Mesian. Sipas pikëpamjes së tyre, Perëndia kurrë nuk do të vendoste lajmëtarët e tij, veçanërisht Mesian, nën një mallkim!

Por për ata që Perëndia i ka thirrur, shkroi Pali — si hebrenj, ashtu edhe grekë — Krishti i kryqëzuar është fuqia dhe urtësia e Perëndisë. Sepse marrëzia e Perëndisë është më e urtë se urtësia njerëzore; dhe dobësia e Perëndisë është më e fortë se fuqia njerëzore.

Në vend të mburrjes me urtësinë dhe fuqinë e tyre, Pali i thirri ata të mburreshin vetëm në Zotin dhe në atë që Ai ka bërë për ta! Ata ishin “askushi” sipas standardeve njerëzore, por Perëndia i bëri “dikushi”. Dhe kështu ndodh edhe me ne. Kur përqafojmë Krishtin dhe atë që Ai ka bërë për ne në kryq, ne përjetojmë urtësinë dhe fuqinë e vërtetë të Perëndisë. Ne bëhemi një bashkësi “dikushi”, të rrëmbyer dhe të transformuar nga ky kryq skandaloz, por i mrekullueshëm. — Brian Keepers

Ndërsa luteni, falënderojeni Perëndinë për hirin e tij të mahnitshëm dhe për mënyrën se si ju ka zgjedhur në Krishtin për të qenë të tijtë.