Të Drejtësuar

Dita 8 | Lexoni nga Romakëve 5:1-11

Të drejtësuar, pra, prej besimit, kemi paqe me Perëndinë, nëpërmjet Jezu Krishtit, Zotit tonë. (v. 1)

Si duhet ta shohim mëkatin? Mendoni pak për një borxhli që ka aq shumë borxhe, saqë asgjë tjetër nuk ka rëndësi për të, por vetëm, se si ta shlyejë borxhin e tij. Borxhi i tij është aq i madh, saqë ai, nuk gëzon asnjë lloj paqeje, gëzimi apo lehtësimi. Asgjë nuk mund ta lehtësoj gjendjen e tij, asnjë ndihmë e jashtme, këshillë, psikolog, apo doktor. Problemi tjetër i këtij borxhliu, është koha e tij e shkurtër. E gjithë shpresa e tij ka vetëm një rrugë dalje, dhe ja, atij i duhet dikush që ta paguajë gjithë borxhin e tij. Por, kush mund të dalë vullnetar dhe të paguajë për të? A është vërtetë ndokush që mund të paguajë borxhin e tij të madh? Veçse nëse personi të cilit ky i detyrohet, zgjedh që ta falë dhe ta konsiderojë të shlyer gjithë borxhin e këtij borxhliu?

Të tilla janë mëkatet tona përpara Perëndisë. Mëkatari që mëkaton dhe nuk ndëshkohet, thjesht po shton borxhin e tij dhe po mbledh mbi veten zemërimin e Perëndisë, për ditën e gjykimit. Por lajmi i mirë është ky: Perëndia siguroi dikë për të shlyer borxhin tonë, Jezu Krishtin, Birin e tij. Për këtë arsye, Jezusi vdiq në kryq, për të paguar në vendin tonë. Ata që besojnë në Krishtin, drejtësohen dhe gëzojnë paqe me Perëndinë, pikërisht sepse Krishti ka paguar borxhin e tyre dhe duke qenë se nuk ka mëkat në ta, që të qëndrojë kundër tyre në ditën e gjykimit, ata përjetojnë që tani, paqe me Perëndinë. A nuk do të donit dikë që të paguajë borxhin tuaj të madh? Çfarë prisni? Besojini Jezusit! – Gentian Dogani

Ndërsa luteni, falënderojeni Perëndinë që ka bërë paqe me ne me anë të Krishtit.

#TëDrejtësuar #BesimTeKrishti #PaqeMePerëndinë #MëkatDheFalim #BorxhiShpirtëror #KrishtiShlyesi #DashuriHyjnore #HiriPerëndisë #Shlyerje #FjalëteShpresës #Meditime