Të kthehemi nga të tjerët

Dita 40 | Lexoni nga Romakëve 14:13-23; Mateu 18:6-7

Le të ndjekim, pra, ato që ndihmojnë për paqen dhe për ndërtimin e njëri-tjetrit. (Rom. 14:19)

Spektatorët e tenisit e kthejnë kokën e tyre sa nga njëra anë, në tjetrën, me qëllim që të shohin ndeshjen. Leximi i sotëm nga Bibla është pak a shumë si një ndeshje tenisi.

Ndërsa përfytyrojmë Febën teksa lexon letrën e Palit në mënyrë dramatike (Dita 33), mund ta imagjinojmë atë që kthehet nga judenjtë që besojnë tek Jezusi tek besimtarët johebrenj, ndërsa është kthyer nga vargjet 1-12 tek vargjet 13-23. Johebrenjtë që besonin tek Jezusi kishin të drejtë që tani i gjithë ushqimi ishte i pranueshëm. Megjithatë, besimtarët judenj kishin përjetuar përndjekje, shok kulturor dhe ndryshime tronditëse. Në pasazhin tonë për sot, Pali u kërkon besimtarëve johebrenj të marrin në konsideratë ndjeshmërinë e besimtarëve judenj. Ndoshta ushqimi nuk ishte përgatitur sipas ligjit të Moisiut, dhe vera mund të ketë qenë përdorur për flijime në tempujt paganë. Nëse besimtarët johebrenj kapardisen me lirinë e tyre të ushqimit përpara besimtarëve judenj, atëherë kjo mund të shkaktonte “skandalizimin” e tyre (v. 21). Pali këtu thekson se liria është e mrekullueshme, mirëpo akoma më e madhe është dashuria për njëri-tjetrin. Besimtarët për të cilët Krishti vdiq (v. 15) ndjekin atë që ndihmon për “ndërtimin e njëri-tjetrit” (v. 19).

Përmes Frymës së Shenjtë, Pali na vështron edhe neve, duke na bërë thirrje që t’i heqim sytë vetëm nga vetja dhe të marrim në konsideratë besimtarët e tjerë. Martin Luteri, reformatori protestant, e tha mirë, kur shkroi: “Një i krishterë është lordi më i lirë nga të gjithë, i cili nuk i nënshtrohet askujt. Një i krishterë është shërbëtori më i përgjegjshëm nga të gjithë, i cili u nënshtrohet të gjithëve”. — Kent Fry

Ndërsa luteni, i kërkoni Frymës së Shenjtë t’jua zbusë zemrën tuaj karshi besimtarëve të tjerë.