Tri mëkatet e një të drejti

Dita 12 | Lexoni nga Isaia 38:1-6

Atëherë Ezekia e ktheu fytyrën nga muri dhe iu lut ZOTIT. (v. 2)

Edhe një njeri i drejtë mund të bjer pre e tre mëkateve: frikës që çon në komprometime, harresës së hirit dhe mëshirës së Perëndisë dhe mburrjes pa përulësi për gjërat e arritura. Këto mëkate janë kaq delikate saqë një person mund të mos arrijë t’i dallojë ato brenda vetes së vet.

Një njeri i drejtë mund t’u dorëzohet komprometimeve nga frika e përndjekjes dhe vdekjes. Dikush tjetër mund t’i marrë si të mirëqena hirin dhe mëshirën e Perëndisë, dhe të mos arrijë të bëjë ndryshime në jetën e vet. Ose dikush tjetër mund të bëhet arrogant dhe krenar për arritjet e veta. Këto mëkate janë kaq të mprehta saqë shpeshherë e kam gjetur veten i ndikuar prej njërës ose tjetrës.

Këto mëkate ishin të dukshme në jetën e mbretit Ezekia. Ai e nisi goxha mirë (2 Mbr. 18:5). Megjithatë, frika nga asirianët çoi në dështimin e tij të parë. Ai u dha atyre gjithë arin dhe argjendin e tempullit (v. 15-16). Kështu mbreti Ezekia u sëmur, dhe Isaia i shqiptoi atij mesazhin e vdekjes. Ndonjëherë vuajtja është bekim. Ezekia u pendua dhe, në dëshpërim e sipër, u lut (Isa. 38:3). Zoti i dha atij edhe 15 vite për t’u reformuar. Megjithatë, menjëherë pasi u shërua, ne lexojmë tek 2 e Kronikave 32:25, që “Ezekia nuk iu përgjigj mirësisë që iu bë atij, sepse zemra e tij ishte bërë krenare; prandaj mbi të, mbi Judë dhe mbi Jerusalem ra zemërimi i ZOTIT”.

Nëse jeni një ndjekës i Jezusit, cila është trashëgimia që po lini pas? Çfarë shembulli u ofroni ju të tjerëve të një jete të mbushur me besim? — Drejtuesi i shërbesës në Azinë Jugore

Ndërsa luteni, i kërkoni Perëndisë t’ju shpëtojë nga mëkati dhe ta bëjë shembull jetën tuaj.