Unitet i plotë

Dita 60 | Lexoni nga Gjoni 17:20-26

…Unë jam në ta dhe ti në mua, që të jenë të përsosur në unitet dhe që bota të njohë që ti më ke dërguar dhe që i ke dashur, ashtu si më ke dashur mua. (v. 23)

Një himn i shkruar nga John Fawcett-i i bën jehonë lutjes së Jezusit: “Bekuar qoftë lidhja që na i bashkon zemrat në dashurinë e krishterë… Para fronit të Atit tonë, ne derdhim lutjet tona të zjarrta; frikërat tona, shpresat tona, synimet tona janë një e vetme, ngushëllimet tona dhe shqetësimet tona.” Ne kemi shumë gjëra të përbashkëta. Megjithatë, shpeshherë përqëndrohemi te dallimet dhe jo te ngjashmëritë. Jezusi do që ne të kërkojmë unitetin. Peter Scholtes-i hodhi në letër këto fjalë për një këngë tjetër bazuar te Gjoni 13:35: “Ne jemi një në Frymë; ne jemi një në Zotin… Dhe do të na njohin që jemi të krishterë nga dashuria për njëri-tjetrin.”

Jezusi u lut me zemër për të gjithë besimtarët që të jenë një, ta shikojnë lavdinë e Tij dhe ta njohin dhe ta ndajnë dashurinë e Tij. Është një thirrje intime për lidhje, bazuar në dashuri. “Dashuria” është një folje, jo thjesht një ide apo ndjenjë. Për Jezusin, dashuria nënkuptonte vetëflijim. Si ta shprehim dashurinë? Siç e thotë edhe kënga e mësipërme: “Ne do të ecim me njëri-tjetrin, do të ecim dorë për dore… Ne do të punojmë me njëri-tjetrin, do të punojmë krah për krah; dhe do ta mbrojmë dinjitetin e secilit dhe do ta shpëtojmë krenarinë e njëri-tjetrit.” Duhet punë dhe bashkëpunim, si edhe përqendrim te dashuria.

Pasi u lut, Jezusi u largua me dishepujt e Tij për të shkuar në kopshtin e Gjetsemanisë, ku e tregoi dashurinë e Tij. Lutjet e tij për paqe, gëzim, lavdi dhe unitet u bëfshin tonat ndërsa mësojmë të jetojmë si ai. — Denise Vredevoogd

Ndërsa luteni, kërkoni fuqi dhe urtësi për të jetuar në përmbushje të lutjeve të Jezusit!

#fjalëteshpresës #meditime #biblestudy #dita60