Vera e re, rroba e re

Dita 18 | Lexoni nga Luka 5:36-39

Dhe pjesa që u hoq nuk i përshtatet së vjetrës. (v. 36)

Dikush e përmblodhi këtë shëmbëlltyrë dhe tha: “Jezusi po u shpjegonte atyre se rruga e tij (rruga e re) dhe rruga e farisenjve (rruga e vjetër) nuk mund të përziheshin. Farisenjtë refuzuan te besonin tek Jezusi (rruga e re) sepse supozuan se rruga e tyre e vjetër ishte më e mirë”.

Ja një shembull që tregon se si mënyra e farisenjve ishte një mënyrë veprash për t’i pëlqyer Zotit. E mbani mend kur Jezusi foli për fariseun që u fut në tempull për t’u lutur? Ai ndërsa lutej tha; “Unë bëj këtë dhe atë; unë agjëroj dy herë në javë; etj.” Kjo mënyrë e tyre tregonte një përpjekje për ta fituar jetën dhe parajsën me anë të veprave. Por Perëndia e ka hedhur poshtë çdo përpjekje për ta fituar, thjesht sepse njeriu nuk mund ta fitojë dot me anë të veprave. Rruga e re që solli Jezusi është vepra që Perëndia e pëlqen dhe e pranon. Ai është i vetmi që ju bind Atit të tij në mënyrë të përsosur. Madje edhe shenjtorët e Dhjatës së Vjetër, të gjithë janë mëkatarë. Ndonëse ata janë shembuj të mirë për t’u imituar, asnjë prej tyre nuk eci në bindje të përsosur. Të gjithë ata gabuan dhe ranë në mëkate.

Kjo është rruga e pëlqyer nga Perëndia, t’i besosh Krishtit. Prandaj Jezusi edhe tha: “Unë jam udha, e vërteta dhe jeta. Askush nuk shkon tek Ati, veçse nëpërmjet meje”(Gjo. 14:6). Përveç mëkateve të shumta që kishin farisenjtë, u shtuan mëkateve të tyre edhe këtë mëkat tepër të rëndë: mohuan Krishtin e Perëndisë, atë që do t’i kishte shpëtuar. A mendoni edhe ju si farisenjtë se rruga juaj është më e mirë se e Krishtit? – Gentian Dogani

Ndërsa luteni, besojini Krishtit dhe ecni në rrugën e tij.

#VeraeRe #RrobateRe #Luka53639 #JezusiështëUdha #BesimiJoVeprat #RrugaeKrishtit #Farisenjtë

#Ungjilli #FjalëteShpresës #Meditime