Zemërbutësia

Dita 71 | Lexoni nga Galatasve 5:22-23; Filipianëve 4:4-7

Por fryti i Frymës është… zemërbutësia. (v. 22-23)

S’e di pse, por kur mendoj për zemërbutësinë në terma moderne, imagjinoj dikë që kundërshton një bullizues. Nuk lufton kundrejt atij, por as nuk e toleron. Një zemërbutësi e tillë ka fuqinë për të përballuar dhunën dhe padrejtësinë. Disa përkthime përdorin “butësinë” në vend të zemërbutësisë, një fjalë që disa kanë qejf ta interpretojnë si “fuqi nën kontroll”. Zemërbutësia nuk ka të bëjë me të qenit i dobët apo ngucës. Ka të bëjë me pasjen e urtësisë në mënyrën si zgjedh ta përdorësh praninë tënde, zërin dhe fuqinë tënde. Zemërbutësia di si të thotë të vërteta guximtare ndaj të pushtetshmëve, plus që di edhe si t’i trajtojë çështjet delikate me kujdes.

Përveç veprës së Frymës, impulset tona na çojnë drejt fjalëve të ashpra dhe shfaqjeve të pakujdesshme të fuqisë. Në kontrast, nëse zemërbutësia lulëzon në ne, si individë, edhe si komunitet, ne mësojmë të jemi të urtë në ndërveprimet tona me të tjerët. Zemërbutësia karakterizon dishepujt e Jezu Krishtit – Fryma na jep forcë për t’i përdorur përpjekjet tona për të mirën e mbretërisë së Perëndisë, jo për ambiciet tona. Kur Pali u tha filipianëve: “Zemërbutësia juaj të njihet nga të gjithë njerëzit” (Filipianëve 4:5), ai e përcolli sa e rëndësishme ishte që të krishterët ta shfaqnin këtë “fuqi nën kontroll”. Ungjilli nuk u imponohet të tjerëve me forcë, sikur mbretëria e Perëndisë të jetë diktaturë e egër. Në vend të kësaj, kur zemërbutësia dhe dashuria dalin fitimtare, njerëzit thirren nga fuqia e qenësishme e vet Ungjillit. – Jessica Bratt Carle

Ndërsa luteni, kërkojini Perëndisë t’ju mësoj fuqinë e zemërbutësisë!

#fjalëteshpresës #meditime #biblestudy #dita71